اسلام آباد (ويب ڊيسڪ) اسلام آباد هاءِ ڪورٽ جسٽس طارق محمود جهانگيري جي مقرري کي غيرقانوني قرار ڏيندي کين عهدي تان هٽائڻ جو حڪم جاري ڪري ڇڏيو آهي، جنهن سان عدالتي حلقن ۾ وڏي هَلچل مچي وئي آهي۔
عدالت پنهنجي تفصيلي فيصلي ۾ چيو آهي ته جسٽس طارق جهانگيري جي هاءِ ڪورٽ ۾ مقرري وقت ايل ايل بي جي ڊگري درست نه هئي، جنهن سبب سندن مقرري قانوني گهرجن تي پوري نه لهندي هئي۔ عدالت واضح ڪيو ته هو جج جي عهدي جا اهل ئي نه هئا، تنهن ڪري کين ڊي نوٽيفاءِ ڪرڻ جو حڪم ڏنو وڃي۔
اسلام آباد هاءِ ڪورٽ جي چيف جسٽس سردار سرفراز ڊوگر ۽ جسٽس اعظم خان گڏيل فيصلو ٻڌائيندي قانون واري وزارت کي هدايت ڪئي ته طارق جهانگيري کي فوري طور جج جي عهدي تان هٽائڻ بابت نوٽيفڪيشن جاري ڪيو وڃي۔
فيصلي کان ٿوري دير اڳ جسٽس جهانگيري عدالت مان روانو ٿي ويو هو، جڏهن ته ڊگري تڪرار واري ڪيس جي ٻڌڻي دوران بيريسٽر صلاح الدين، اڪرم شيخ، راجه عليم عباسي ۽ ٻين وڪيلن تفصيلي دليل پيش ڪيا۔ درخواستگذار ميان داؤد ايڊووڪيٽ پڻ پنهنجا دليل ڏنا، جن کان پوءِ ججز چيمبر ۾ هلي ويا ۽ فيصلو محفوظ ڪيو ويو۔
عدالت سڀ الڳ الڳ درخواستون اُڪلائيندي قرار ڏنو ته جسٽس طارق جهانگيري جي مقرري بنيادي قانوني معيارن تي پوري نه لهندي هئي، تنهن ڪري هو اسلام آباد هاءِ ڪورٽ جو جج بڻجڻ جا اهل نه هئو۔
