ممبئي (ويب ڊيسڪ) بالي ووڊ جي مشهور اداڪاره ندهي اگروال هڪ فلمي تقريب دوران خوفناڪ صورتحال جو شڪار ٿي وئي، جتي بي قابو هجوم هن کي هر طرف کان گهيري ورتو ۽ انتظاميا مڪمل طور ناڪام نظر آئي۔
Unfcukingbelievable. pic.twitter.com/Wnb788KoFY
— Wokeflix (@wokeflix) December 17, 2025
هي واقعو سندس ايندڙ فلم دي راجا صاحب جي گاني “ساھنا ساھنا” جي لانچ تقريب ۾ پيش آيو، جنهن کان پوءِ سوشل ميڊيا تي سڪيورٽي ۽ انتظامي نااهلي بابت سخت سوال اٿڻ لڳا آهن۔
وائرل ٿيندڙ وڊيوز ۾ ڏسي سگهجي ٿو ته جيئن ئي اداڪاره تقريب کان ٻاهر نڪري ٿي، مردن جو وڏو هجوم اوچتو هن جي چوڌاري جمع ٿي وڃي ٿو۔ بدنظمي ۽ دٻاءَ سبب ندهي کي وڏي مشڪل سان گاڏي تائين پهچايو ويو، جڏهن ته سڪيورٽي عملي جي ڪارڪردگي انتهائي ڪمزور نظر آئي۔
وڊيو سامهون اچڻ شرط سوشل ميڊيا تي شديد ڪاوڙ پکڙجي وئي۔ صارفين سوال ڪيو ته فلمي تقريبن ۾ عورت فنڪارن جي حفاظت لاءِ مناسب انتظام ڇو ناهن ڪيا ويندا؟
گلوڪاره چن مئي سري پاڊا سخت ردعمل ڏيندي لکيو ته مردن جو اهو رويو “لڪڙ ڀڳن کان به بدتر” آهي، ۽ لڪڙ ڀڳن سان تشبيهه ڏيڻ به انهن جي توهين آهي۔
ڪيترن صارفين ذميواري سڌي طرح فلم جي ٽيم ۽ ايونٽ مينيجمينٽ تي وڌي ڇڏي، چئي رهيا آهن ته هي مداحن جو جنون نه پر انتظامي نااهلي جو نتيجو آهي، جتي هجوم کي ڪنٽرول ڪرڻ جو ڪو واضح نظام موجود نه هو۔ ڪجهه ماڻهن ته ميڙ کي “مداحن جي لباس ۾ درندا” قرار ڏنو۔
هن وقت تائين نه ندهي اگروال ۽ نه ئي دي راجا صاحب جي ٽيم طرفان ڪو باضابطه بيان جاري ڪيو ويو آهي، پر هي واقعو هڪ ڀيرو ٻيهر فلمي تقريبن ۾ سڪيورٽي جي خراب صورتحال تي بحث ڇيڙي ڇڏيو آهي۔
