ڪراچي(اسٽاف رپورٽر) جماعت اسلامي اڄ شهر ۾ وڌندڙ هيوي ٽريفڪ حادثن، اي‑چالان جي نالي تي عوام کان پيسا وصول ڪرڻ، سرڪاري بي حسي ۽ تباه حال انفراسٽرڪچر خلاف ڪراچي جي مختلف هنڌن تي احتجاجي ڌرڻا هڻن جو اعلان ڪيو آهي.
امير جماعت اسلامي ڪراچي منعم ظفر خان موجب خوني ٽينڪرن، ڊمپرن ۽ هيوي ٽريفڪ سبب وڌندڙ فوتگين، شهرين جي حق تلفي، روڊن جي خراب حالت ۽ حڪومت جي ناڪامي خلاف اڄ جمعي ڏينهن احتجاجي ڌرڻا هنيا ويندا.
جماعت اسلامي جي پڌرائي موجب شهر جي وڏين ۽ مرڪزي شاهراهن ۽ اهم پبلڪ هنڌن تي شام 5 وڳي ڌرڻا شروع ٿيندا. امير جماعت اسلامي ڪراچي منعم ظفر خان نوراني ڪباب هائوس چورنگي، شاهراهه قائدين تي مرڪزي ڌرڻي کي خطاب ڪندا.
ڌرڻا هنن هنڌن تي ٿيندا:
ڪالا بورڊ نيشل هاءِ وي، تبت سينٽر ايم اي جناح روڊ، داؤد چورنگي، شاهراهه ڪورنگي ڪراسنگ، پاور هائوس چورنگي نارٿ ڪراچي، يونيورسٽي روڊ موسميات، حيدري مارڪيٽ شير شاهه سوري، لياقت آباد نمبر 10، شاهراهه اورنگي پنج نمبر، گارڊن آفس مين حب ريوَر روڊ، پراچو چوڪ شير شاهه، سهراب گوٺ سپر هاءِ وي ۽ ٻين هنڌن تي.
سيڪريٽري جنرل جماعت اسلامي ڪراچي توفيق الدين صديقي شهرين کي اپيل ڪئي آهي ته هو ڌرڻن ۾ ڀرپور شرڪت ڪري سنڌ حڪومت ۽ ٽريفڪ پوليس جي نااهلي خلاف پنهنجو احتجاج رڪارڊ ڪرائن.
