ڍاڪا (ويب ڊيسڪ) بنگلاديشي پوليس دعويٰ ڪئي آهي ته شريف عثمان هادي تي فائرنگ ڪندڙ مرڪزي جوابدار فيصل ڪريم مسعود ۽ سندس ساٿي موٽرسائيڪل سوار عالمگير شيخ حملي کانپوءِ ڀارت فرار ٿي ويا۔ پوليس ذريعن موجب، ٻئي جوابدار جمعي جي ڏينهن ميمن سنگھ جي علائقي هلوآ گھاٽ جي رستي سان سرحد پار ڪري ڀارت ۾ داخل ٿيا۔
جاچ اختيارين جو چوڻ آهي ته واقعي واري ڏينهن جوابدار ميرپور کان غازي پور ويا ۽ مختلف گاڏيون تبديل ڪندي سرحدي علائقي تائين پهتا۔
ٻئي پاسي بنگلاديش جي پرڏيهي وزارت ڍاڪا ۾ ڀارتي هاءِ ڪمشنر پرنئي ورما کي طلب ڪري مطالبو ڪيو آهي ته جيڪڏهن جوابدار ڀارتي حدن ۾ موجود هجن ته کين گرفتار ڪري بنگلاديش حوالي ڪيو وڃي۔
ڍاڪا ميٽروپوليٽن پوليس موجب، سرحد پار ڪرڻ ۾ مدد ڏيڻ جي شڪ ۾ ٻه ماڻهو حراست ۾ ورتا ويا آهن، جڏهن ته موٽرسائيڪل جو مالڪ محمد عبدالحنان به گرفتار ڪري ريمانڊ تي ورتو ويو آهي۔
پوليس اختيارين تصديق ڪئي آهي ته فيصل ڪريم مسعود ئي عثمان هادي تي فائرنگ ڪندڙ مرڪزي جوابدار آهي، جڏهن ته عالمگير شيخ سياسي تنظيم ڇاترا ليگ سان لاڳاپيل رهيو آهي۔ جاچ جاري آهي، پر جوابدار جي موجوده جاءِ بابت معلومات اڃا تائين سامهون نه آئي آهي۔
