اسلام آباد(ويب ڊيسڪ) ناڻي واري مملڪتي وزير بلال اظهر ڪياني چيو آهي ته گڏيل قومن جي رپورٽ ۾ واضح طور تي لکيل آهي ته ڀارت پهلگام واقعي کان پوءِ شهرين جا بنيادي حق ختم ڪيا، ۽ هي رپورٽ ان ڳالهه جو ثبوت آهي ته ڀارت کي پاڪستان کان معافي گهرڻي پوندي۔
بلال اظهر ڪياني جو چوڻ هو ته وزيراعظم شهباز شريف ۽ فيلڊ مارشل سيد عاصم منير سفارتي محاذ تي مضبوط ۽ ٺوس ڪيس وڙهيو، جنهن جي نتيجي ۾ مئي کان اڄ تائين عالمي سطح تي پاڪستان جي موقف جي تصديق ٿي رهي آهي۔ هن چيو ته گڏيل قومن جي رپورٽ پاڪستان جي سفارتي ۽ اخلاقي فتح جو ثمر آهي۔
هن وڌيڪ چيو ته يو اين رپورٽ عالمي سطح تي پاڪستان ۽ قومي دفاع لاءِ هڪ اهم اڳڀرائي آهي۔ ڪشمير جي معاملي تي ڀارت گڏيل قومن جي چارٽر جي لاڳيتو ڀڃڪڙي ڪري رهيو آهي ۽ هاڻي کيس يو اين قراردادن تي عمل ڪرڻو پوندو۔
بلال اظهر ڪياني چيو ته پاڪستان ڀارت خلاف جنگ کٽي چڪو آهي ۽ اسان پهرين ڏينهن کان چوندا آيا آهيون ته خطي ۾ جارحيت ڪندڙ ملڪ ڀارت آهي، پاڪستان جا حق ڪنهن به صورت ۾ دٻائي نٿا ٿي سگهن۔
هن وڌيڪ وضاحت ڪئي ته پاڪستان جنگ دوران ۽ ان کان پوءِ به عالمي قانونن تي مڪمل عمل ڪيو، جڏهن ته گذريل ڇهن مهينن کان سفارتي سطح تي لاڳيتو مضبوط پوزيشن تي اچي رهيو آهي، جنهن جو اعتراف هاڻي عالمي ادارا به ڪري رهيا آهن۔
