انقره، ترڪي (ويب ڊيسڪ) ترڪ گهرو وزير علي يرليڪايا موجب فالڪن 50 طرز جو بزنس جيٽ، جنهن جو ٽيل نمبر 9H-DFJ هو، انقره جي ايـسن بوغا ايئرپورٽ تان مقامي وقت مطابق رات 8:10 تي طرابلس لاءِ روانو ٿيو.
اڏام جي لڳ ڀڳ 42 منٽن بعد، رات 8:52 تي جهاز جو ڪنٽرول ٽاور سان رابطو ڪٽجي ويو. گهرو وزير ٻڌايو ته جهاز انقره جي ڏکڻ ۾ واقع حائمانا جي ويجهو ايمرجنسي لينڊنگ جو سگنل موڪليو، پر ابتدائي سگنل کان پوءِ ٻيهر ڪو رابطو قائم نه ٿي سگهيو.
ترڪ اختيارين موجب جهاز ۾ مجموعي طور پنج ماڻهو سوار هئا، جن ۾ ليبيا جو آرمي چيف محمد علي الحداد به شامل هو. ترڪ نشرياتي ادارن جي رپورٽن مطابق انقره جي فضائي حدن ۾ هڪ نجي جهاز سان ريڊيو رابطو ختم ٿي ويو، جنهن بابت شڪ آهي ته ان ۾ ليبيا جو آرمي چيف موجود هو.
فلائيٽ ٽريڪنگ ڊيٽا موجب احتياطي اُپاءَ طور ايـسن بوغا ايئرپورٽ تي ڪيترين ئي اُڏامن جو رخ تبديل ڪيو ويو.
ان کان اڳ ترڪي جي بچاءُ واري وزارت اعلان ڪيو هو ته ليبيا جو چيف آف اسٽاف سرڪاري دوري تي انقره ۾ موجود هو، جتي هن پنهنجي ترڪ هم منصب ۽ ٻين اعليٰ عسڪري آفيسرن سان ملاقاتون ڪيون. هي دورو ٻنهي ملڪن جي وچ ۾ جاري عسڪري ۽ سيڪيورٽي تعاون جو حصو هو.
