پاڪستان ۾ 5جي سروس شروع ٿيڻ ۾ هاڻي رڳو ڪجهه مهينا باقي آهن، جتي وفاقي ڪابينا اسپيڪٽرم نيلامي بابت سفارشن جي منظوري ڏيڻ واري آهي۔ عملدارن موجب هن قدم سان وڏن شهرن ۾ انٽرنيٽ ڪنيڪٽي ويوٽي ۽ ڊجيٽل خدمتن ۾ نمايان بهتري ايندي۔
آءِ ٽي واري وزارت اقتصادي رابطا ڪميٽي (اي سي سي) جي منظوري کان پوءِ تيارين ۾ تيزي آندي آهي۔ ذميوار ذريعن موجب هڪ ايڊوائزري ڪميٽي ڇهن اسپيڪٽرم بئنڊن جي نيلامي بابت سفارشون پيش ڪري ڇڏيون آهن، جڏهن ته حتمي منظوري ايندڙ ڪابينا اجلاس يا سرڪوليشن سمري ذريعي متوقع آهي۔
ڪابينا جي منظوري کان پوءِ فوري طور انفارميشن ميمورنڊم جاري ڪيو ويندو، جنهن تحت ٽيليڪام ڪمپنين کي نيلامي جي تياري لاءِ 40 کان 45 ڏينهن جو وقت ڏنو ويندو۔ اسپيڪٽرم نيلامي 15 فيبروري 2026ع کان اڳ ميڊيا جي موجودگي ۾ کليل نموني ڪرائڻ جو منصوبو آهي، جڏهن ته شفافيت کي يقيني بڻائڻ لاءِ گهٽ ۾ گهٽ اگهه اڳواٽ مقرر ڪيا ويندا۔
نيلامي جا بئنڊ ۽ ترجيحات
ذريعن تصديق ڪئي آهي ته نيلامي لاءِ ڇهه اسپيڪٽرم بئنڊ پيش ڪيا ويندا، جن ۾ شروعاتي 5جي سروس لاءِ 600 ميگاهرٽز بئنڊ شامل آهي۔ ان کان علاوه 2600 ميگاهرٽز بئنڊ (194 ميگاهرٽز پرائم اسپيڪٽرم) ۽ 3500 ميگاهرٽز بئنڊ کي تيز ترين رول آئوٽ لاءِ ترجيح ڏني ويندي۔ اضافي بئنڊن ۾ 700، 1800، 2100 ۽ 2300 ميگاهرٽز شامل آهن۔
حڪومت جو مقصد 300 ميگاهرٽز کان وڌيڪ اسپيڪٽرم نيلام ڪرڻ آهي، جنهن مان 100 ميگاهرٽز خاص طور خدمتن ۾ بهتري ۽ 5جي انفراسٽرڪچر جي توسيع لاءِ مختص ڪيو ويندو۔ هر بئنڊ جي بنيادي قيمت مختلف هوندي، جنهن بابت حتمي فيصلو حڪومت ڪندي۔
شرڪت
پاڪستان جون ٽي وڏيون موبائل سروس فراهم ڪندڙ ڪمپنيون نيلامي ۾ شرڪت ڪرڻ جون اميدوار آهن، جڏهن ته پرڏيهي ڪمپنين کي به بغير ڪنهن پابندي جي حصو وٺڻ جي اجازت هوندي۔ عملدارن موجب هن منصوبي لاءِ وڏي سيڙپڪاري گهربل هوندي، جنهن ۾ هر سال نون ٽاورن جي انسٽاليشن ۽ موجوده ٽاورن جي فائبرائيزيشن جا هدف شامل هوندا ته جيئن نيٽ ورڪ جي گنجائش ۽ معيار بهتر بڻائي سگهجي۔
5جي لانچ جا هدف
نيلامي کان پنجن کان ڇهن مهينن اندر 5جي سروس شروع ڪرڻ جو هدف مقرر ڪيو ويو آهي، جنهن جي شروعات اسلام آباد، لاهور ۽ ڪراچي سميت وڏن شهرن مان ڪئي ويندي۔ عملدارن جو اندازو آهي ته پهرين سال ۾ موبائل انٽرنيٽ جي رفتار 4 ايم بي پي ايس مان وڌي 25 ايم بي پي ايس تائين پهچي ويندي۔
ان سان گڏ سالياني بنيادن تي انفراسٽرڪچر جي هدفن تحت ٽاورن جي تعداد ۾ واڌ ۽ فائبرائيزيشن تي خاص ڌيان ڏنو ويندو، جيئن اعليٰ معيار ۽ قابلِ اعتماد 5جي خدمتون مهيا ڪري سگهجن۔
