راولپنڊي(ويب ڊيسڪ) پاڪ فوج واضح ڪيو آهي ته دهشتگردي، ڏوهن ۽ سياسي مفادن جي وچ ۾ ڪنهن به قسم جو ڳٺهه جوڙ قبول نه ڪيو ويندو ۽ ڀارتي سرپرستي هيٺ ڪم ڪندڙ سڀ دهشتگرد، انهن جا سهولتڪار ۽ مددگار بغير ڪنهن رعايت جي فيصلائتي ڪارروائيءَ جو نشانو بڻبا. فوجي قيادت زور ڏنو آهي ته فوج ۽ عوام جي وچ ۾ ويڇا پيدا ڪرڻ جي ڪنهن کي به هرگز اجازت نه ڏني ويندي.
آءِ ايس پي آر جي جاري ڪيل بيان موجب، چيف آف آرمي اسٽاف ۽ چيف آف ڊي فنس فورسز فِيلڊ مارشل عاصم منير جي صدارت هيٺ 273هين ڪور ڪمانڊرز ڪانفرنس ٿي. اجلاس جي شروعات ۾ فوجي اهلڪارن، قانون لاڳو ڪندڙ ادارن ۽ تازين دهشتگرديءَ جي واقعن ۾ شهيد ٿيندڙ بيگناهه شهرين لاءِ فاتحه خواني ڪئي وئي.
فورم ۾ شرڪت ڪندڙن انهن شهيدن کي ڀيٽا پيش ڪئي وئي جن پنهنجي جانين جو نذرانو پيش ڪري مادرِ وطن جو دفاع ڪيو. چيف آف ڊي فنس فورسز پاڪ فوج جي بهادري، پيشيوراڻي مهارت ۽ قربانين کي ساراهيو.
آرمي چيف ۽ چيف آف ڊي فنس فورسز ملڪ ۾ انٽيليجنس بنياد تي ٿيندڙ دهشتگردي مخالف ڪارروائين ۾ فوج جي پرعزم ڪوششن کي ساراهيندي چيو ته حڪومت ۽ فوج جي گڏيل ڪوششن ۽ عوام جي ثابت قدميءَ سان پاڪستان آهستي آهستي پر يقيني طور استحڪام، وڌيڪ موقعن ۽ عزت ڏانهن وڌي رهيو آهي.
ڪانفرنس ۾ اندروني ۽ بيروني سلامتيءَ جي صورتحال جو جامع جائزو ورتو ويو ۽ شرڪت ڪندڙن زور ڏنو ته ڀارتي سرپرستي هيٺ ڪم ڪندڙ سڀ دهشتگرد ۽ انهن جا مددگار بغير ڪنهن رعايت جي ختم ڪيا ويندا. فورم واضح ڪيو ته قومي اتحاد، سلامتي ۽ استحڪام کي نقصان پهچائڻ جي ڪنهن کي به اجازت نه ڏني ويندي، ڀلي اهي سياسي عنصر هجن يا ٻيا.
ڪور ڪمانڊرز ڪانفرنس بلوچستان حڪومت جي خاص ترقياتي قدمن کي ساراهيو، جيڪي مقامي سطح تي عوام کي بااختيار بڻائڻ ۽ سماجي رابطن ذريعي دهشتگرديءَ جا سبب ختم ڪرڻ ۾ مددگار ثابت ٿي رهيا آهن. شرڪت ڪندڙن زور ڏنو ته قومي ايڪشن پلان تحت ٻين علائقن ۾ به اهڙا عوامي قدم کڻڻ ضروري آهن ته جيئن پائيدار امن ۽ استحڪام کي يقيني بڻائي سگهجي.
ڪانفرنس ۾ ڪشميري عوام جي حقِ خوداراديت ۽ سندن جائز جدوجهد لاءِ پاڪستان جي ثابت قدميءَ جو عزم ڪيو ويو، جڏهن ته فلسطين جي مسئلي تي پاڪستان جي اصولي موقف جي به تصديق ڪئي وئي. آءِ ايس پي آر موجب، فورم غزه ۾ فوري ۽ مستقل جنگبندي، بنا رڪاوٽ انساني امداد جي رسائي ۽ فلسطيني رياست لاءِ هڪ قابلِ اعتماد رستي جو مطالبو ڪيو.
اجلاس جي آخر ۾ آرمي چيف ۽ چيف آف ڊي فنس فورسز ڪمانڊرز کي هدايت ڪئي ته آپريشنل تياري، نظم و ضبط، تربيت، جسماني فٽنس، جدت ۽ جنگي ميدان ۾ پيشيوراڻي مهارت جي اعليٰ معيار کي برقرار رکيو وڃي. فوجي قيادت پاڪ فوج جي قومي خودمختياري ۽ علاقائي سالميت جي تحفظ لاءِ مڪمل اعتماد جو اظهار ڪندي چيو ته فوج روايتي ۽ غير روايتي کان وٺي هائبرڊ ۽ غير متناسب خطرن تائين هر قسم جي چيلينجن جو مؤثر مقابلو ڪرڻ جي صلاحيت رکي ٿي.
