ڪراچي(ويب ڊيسڪ) پاڪستان جي ناليواري معاشيات جي ماهر، ناڻي واري اڳوڻي وفاقي وزير ۽ اسٽيٽ بئنڪ جي پهرين عورت گورنر ڊاڪٽر شمشاد اختر لاڏاڻو ڪري وئي. رپورٽن موجب سندن جناز نماز سڀاڻي نمازِ ظهر کان پوءِ ڪراچي ۾ ادا ڪئي ويندي.
ڊاڪٽر شمشاد اختر جنوري 2006ع ۾ اسٽيٽ بئنڪ آف پاڪستان جي 14هين گورنر طور ذميواري سنڀالي ۽ ملڪ جي تاريخ ۾ پهرين عورت گورنر بڻجي قومي مالي ادارن ۾ نئون باب کوليو. بينڪنگ ۽ مالي پاليسين ۾ سندن قومي ۽ عالمي سطح تي وسيع تجربو رهيو.
اسٽيٽ بئنڪ ۾ مقرر ٿيڻ کان اڳ هوءَ ايشيائي ترقياتي بينڪ ۾ ڊائريڪٽر جنرل، ڏکڻ اوڀر ايشيا طور ڪم ڪري رهي هئي، جتي هوءَ 1990ع کان مختلف اهم عهدن تي رهي. عالمي بينڪ سان به هوءَ ڏهه سال پاڪستان ۾ ماهرِ معاشيات طور ڪم ڪندي رهي ۽ وفاقي ۽ صوبائي حڪومتن سان منصوبه بندي جي شعبن ۾ خدمتون سرانجام ڏنيون.
شمشاد اختر جو علمي سفر به شاندار رهيو. حيدرآباد ۾ ڄاول، هن ابتدائي تعليم ڪراچي ۽ اسلام آباد ۾ حاصل ڪئي. پنجاب يونيورسٽي مان بي اي اڪنامڪس، قائداعظم يونيورسٽي مان ايم ايس سي، ۽ پوءِ برطانيه مان ڊاڪٽرٽ مڪمل ڪئي. هوءَ فلبرائٽ اسڪالر رهي ۽ هارورڊ يونيورسٽي ۾ وزٽنگ فيلو طور به ڪم ڪيو.
شمشاد اختر مالي پاليسي، زري نظام، بينڪنگ ۽ سرمائيداري منڊي جي اصلاحات تي ڪيترائي مقالا لکيا ۽ عالمي سطح تي سيمينارن ۾ پاڪستان جي نمائندگي ڪئي. هوءَ پاڪستان جي مالي منڊي ۾ تنوع آڻڻ، سيڪيورٽيز اينڊ ايڪسچينج ڪميشن ۽ انشورنس ڪميشن جي تشڪيل نو، ۽ بانڊ مارڪيٽ جي فروغ لاءِ اهم ڪردار ادا ڪندي رهي.
ڊاڪٽر شمشاد اختر جي وفات سان پاڪستان هڪ قابل، محنتي ۽ عالمي سطح تي تسليم ٿيل ماهرِ معاشيات کان محروم ٿي ويو آهي، جن جي خدمتن کي هميشه ياد رکيو ويندو.
