ڪراچي: بگ بیش ليگ ۾ ميلبرن اسٽارز جي نمائندگي ڪندڙ پاڪستاني فاسٽ بالر حارث رؤف هڪ جان ليوا حادثي کان بال بال بچي ويو.
گذريل ڏينهن بي بي ايل جي چوڏهين ميچ ۾ سڊني ٿنڊرز خلاف حارث رؤف شاندار ڪارڪردگي ڏيکاري، 29 رنز جي عيوض 3 وڪيٽون حاصل ڪري مين آف دي ميچ جو اعزاز حاصل ڪيو.
ميچ جي پهرين اننگز دوران آخري اوور جي چوٿين بال تي ريس ٽوپلي شاٽ کيڏي، جنهن تي بال هوا ۾ بلند ٿي ويو. ڪيچ لاءِ شارٽ ٿرڊ تي موجود حارث رؤف ۽ ڊيپ پوائنٽ تي موجود هيلٽن ڪارٽرائٽ هڪ ئي وقت ڊوڙيا ۽ ٻنهي فل لينٿ ڊائيو لڳائي.
ان لمحي دوران ٻنهي رانديگرن جا سر هڪ ٻئي سان ٽڪرائڻ کان بال بال بچيا، جنهن منظر ڪمنٽيٽرز کي به خوفزده ڪري ڇڏيو. ڪمنٽيٽرز جو چوڻ هو ته جيڪڏهن ٽڪر ٿي وڃي ها ته صورتحال انتهائي خوفناڪ ٿي سگهي ٿي.
حارث رؤف جي شاندار ڪارڪردگي نه رڳو ميلبرن اسٽارز کي فتح ڏيارڻ ۾ اهم ڪردار ادا ڪيو، پر سندس جرئت ۽ فٽنس به شائقين کان داد حاصل ڪيو.
