اسلام آباد(ويب ڊيسڪ) وفاقي وزير خزانه سينيٽر محمد اورنگزيب چيو آهي ته زراعت، معدنيات ۽ کاڻ، هٿرادو ذهانت ۽ ڊجيٽل معيشت اهي شعبا آهن جن ۾ چيني سيڙپڪاري تيزي سان وڌي رهي آهي.
چائنا گلوبل ٽيليويزن نيٽورڪ کي ڏنل انٽرويو ۾ ناڻي واري وزير وضاحت ڪئي ته هاڻي تعاون رڳو سيڙپڪاري تائين محدود ناهي، پر علم جي منتقلي ۽ ٽيڪنيڪي سهڪار کي به خاص اهميت ڏني پئي وڃي. هن ٻڌايو ته پاڪستان ايندڙ هفتن ۾ چيني ڪيپيٽل مارڪيٽ ۾ پانڊا بانڊ جاري ڪرڻ لاءِ تيار آهي، جيڪو ٻنهي ملڪن جي مالي ۽ اقتصادي لاڳاپن کي وڌيڪ مضبوط بڻائيندو.
محمد اورنگزيب چيو ته پاڪستان ۽ چين جا لاڳاپا هاڻي رڳو انفرااسٽرڪچر تائين محدود نه رهيا آهن، پر هڪ وسيع مارڪيٽ تي ٻڌل اقتصادي ڀائيواري ۾ تبديل ٿي چڪا آهن. هن ٻڌايو ته چين پاڪستان جو سڀ کان وڏو واپاري ڀائيوار آهي ۽ هن سال جي پهرين اٺن مهينن ۾ ٻنهي ملڪن جي واپاري حجم لڳ ڀڳ 17 ارب آمريڪي ڊالر تائين پهچي ويو آهي.
ناڻي واري وزير چيو ته چين پاڪستان جي اقتصادي ترقي ۾ اهم ڪردار ادا ڪيو آهي، خاص طور تي چين-پاڪستان اقتصادي راهداري (سي پيڪ) ذريعي، جيڪو بيلٽ اينڊ روڊ انيشيٽو جو نمايان منصوبو آهي. سي پيڪ جي پهرين مرحلي ۾ روڊن، بندرگاهن، هوائي اڏن ۽ توانائي جي منصوبن تي ڌيان ڏنو ويو، جڏهن ته صدر شي جن پنگ ۽ وزيراعظم لي چيانگ سان ملاقاتن کان پوءِ سي پيڪ جو ٻيو مرحلو باضابطه طور شروع ٿي چڪو آهي.
هن ٻڌايو ته سي پيڪ فيز ٽو ۾ موجوده انفرااسٽرڪچر کي معاشي طور مؤثر بڻائڻ تي ڌيان ڏنو پيو وڃي، جيڪو بزنس ٽو بزنس تعاون تي ٻڌل آهي ۽ نجّي شعبي جي اڳواڻي ۾ پائيدار ترقي ڏانهن هڪ اهم قدم آهي.
محمد اورنگزيب چيو ته هزارين پاڪستاني زرعي گريجوئيٽس کي چيني يونيورسٽين ۾ داخلا ڏني وئي آهي ته جيئن هو جديد زرعي طريقا سکڻ بعد ملڪ واپس اچي زراعت کي جديد بڻائين. ساڳي وقت وڏيون چيني ٽيڪنالاجي ڪمپنيون هزارين پاڪستاني آءِ ٽي گريجوئيٽس کي تربيت فراهم ڪري رهيون آهن، جيڪو پاڪستان جي ڊجيٽل ترقي لاءِ هڪ مثبت موڙ آهي.
عالمي غير يقيني صورتحال ۽ جغرافيائي تڪرارن جي حوالي سان وزير خزانه چيو ته پاڪستان جي پاليسي چين سان ديرينه ڀائيواري کي وڌيڪ مضبوط ڪرڻ تي مرڪوز آهي. هن چيو ته چين نه رڳو واپار ۽ سيڙپڪاري ۾ مدد ڪئي آهي، پر اهم اقتصادي مرحلن ۾، بشمول آءِ ايم ايف پروگرام، پاڪستان جو ڀرپور ساٿ ڏنو آهي.
وزير خزانه ٻڌايو ته پانڊا بانڊ جي اجرا سان پاڪستان کي دنيا جي ٻي وڏي ڪيپيٽل مارڪيٽ تائين رسائي حاصل ٿيندي، جنهن سان ڊالر تي ڀاڙڻ گهٽ ٿيندو ۽ فنانسنگ جا ذريعا ظاهر ٿيندا.
هن اعتراف ڪيو ته ماضي ۾ پاڪستان هن مارڪيٽ مان مڪمل فائدو نه وٺي سگهيو، پر هاڻي چيني سيڙپڪارن کان مثبت ردعمل جي اميد آهي. ٻنهي ملڪن جي وچ ۾ هڪ واضح اسٽريٽجڪ ۽ اقتصادي روڊ ميپ موجود آهي، جيڪو تازين اعليٰ سطحي ملاقاتن کان پوءِ طئي ٿيو آهي.
وزارت خزانه موجب پاڪستان ۾ پهريون ڀيرو نجّي سرمائي سان هلندڙ اسڪلز امپيڪٽ بانڊ جو آغاز ڪيو ويو آهي. هڪ ارب رپين جي پائلٽ پروگرام تحت مهارتن جي ترقي کي نتيجن سان مشروط ڪيو ويو آهي، جنهن ۾ روزگار لازمي هدف آهي.
هي پروگرام ٽن سالن لاءِ آهي، جنهن ۾ توسيع جو امڪان آهي. نوجوانن کي جديد ڊجيٽل ۽ ٽيڪنيڪي مهارتن سان ليس ڪرڻ جو منصوبو آهي، جنهن ۾ بلاڪ چين ۽ هاءِ ويليو ڊجيٽل اسڪلز شامل آهن.
محمد اورنگزيب چيو ته پاڪستان دنيا جي ٽين وڏي فري لانس ڪميونٽي رکي ٿو، جڏهن ته نئيوٽڪ جو ڪردار انساني وسيلن جي ترقي ۾ اهم آهي. هن ٻڌايو ته اسڪلز پروگرام ۾ عورتن جي 40 سيڪڙو شموليت کي يقيني بڻايو ويو آهي، ڇو ته عورتن جي معاشي شموليت ملڪ جي مستقبل لاءِ ضروري آهي.
ناڻي واري وزارت موجب پاڪستان ۾ سوشل امپيڪٽ فنانسنگ جو باقاعده آغاز ٿي چڪو آهي، جنهن ۾ تعليم ۽ انساني سرمايو قومي ترجيحن ۾ شامل آهي. بينڪ آف پنجاب، برٽش ايشيئن ٽرسٽ ۽ ايف سي ڊي او به هن منصوبي جا شريڪ آهن.
ماهرن موجب مهارتن جي ترقي سان روزگار، پيداوار ۽ برآمدات ۾ واڌ ٿيندي. اسڪلز ڊولپمينٽ هاڻي خيراتي ڪم نه پر سيڙپڪاري تصور ڪيو ويندو، جتي حڪومت، نجّي شعبي ۽ عالمي ڀائيوارن هڪ پليٽفارم تي گڏيل ڪم ڪري رهيا آهن.
