ڪراچي(اسٽاف رپورٽر) ڪراچي ۾ تقريباً پنجاهه سالن کان پوءِ ڊبل ڊيڪر بسون ٻيهر روڊن تي هلڻ لڳيون، جنهن سان شهرين جون پراڻيون يادون تازيون ٿي ويون. سينيئر وزير شرجيل انعام ميمڻ ۽ صوبائي وزير سيد ناصر حسين شاهه بس سروس جو افتتاح ڪيو، جيڪا آزمائشي طور ملير کان شاهراهه فيصل تائين هلائي وئي.
افتتاحي تقريب ۾ وزيرن کي بسن جون خاصيتون ٻڌايون ويون. شرجيل ميمڻ ميڊيا سان ڳالهائيندي چيو ته عوام سان ڪيل واعدو پورو ڪيو ويو آهي ۽ 2026 ۾ ٽرانسپورٽ جون وڌيڪ سهولتون فراهم ڪيون وينديون. هن ٻڌايو ته وزيراعليٰ سنڌ جي هدايت تي نئين سال ۾ هر روڊ تي ڊبل ڊيڪر بسون هلنديون.
واضح رهي ته ڊبل ڊيڪر بسن سان ڪراچي جي تاريخ جو گهرو تعلق رهيو آهي. 1960 ۽ 1970 جي ڏهاڪن ۾ اهي بسون شهر جي سڃاڻپ سمجهيون وينديون هيون، خاص طور تي صدر، بندر روڊ ۽ ايم اي جناح روڊ تي. انهن جي مٿئين منزل تي سفر ڪرڻ شاگردن ۽ نوجوانن لاءِ هڪ خوشگوار تجربو هوندو هو.
وقت سان گڏ وڌندڙ آبادي، ٽريفڪ جو دٻاءُ ۽ سار سنڀال جي کوٽ سبب اهي بسون آهستي آهستي ختم ٿي ويون ۽ مني بسن ۽ ڪوچز انهن جي جاءِ ورتي. هاڻي آزمائشي سروس کي هڪ مثبت قدم قرار ڏنو پيو وڃي، ۽ جيڪڏهن منصوبي کي ڪاميابي ملي ته جديد سهولتن سان وڌيڪ بسون مختلف روٽن تي هلنديون، جنهن سان نه رڳو ٽرانسپورٽ جا مسئلا گهٽ ٿيندا پر ڪراچي جي ماضي جي هڪ خوبصورت روايت به ٻيهر زنده ٿيندي.
وزيراعليٰ سنڌ مراد علي شاهه بسن کي شهرين لاءِ تحفو قرار ڏيندي چيو ته ڪراچي جا ماڻهو بهتر سفري سهولتن جا حقدار آهن. هن چيو ته جديد بس سروس سان شهر اڳتي وڌي رهيو آهي، ۽ هاڻي بهتر سفر صرف واعدو نه پر هڪ عملي حقيقت بڻجي رهيو آهي.
