ڪراچي(اسٽاف رپورٽر) رجب بٽ تي تشدد واري واقعي کان پوءِ ڪراچي بار ايسوسيئيشن جي جنرل باڊي اجلاس ۾ فيصلو ڪندي هڙتال عارضي طور ختم ڪرڻ جو اعلان ڪيو آهي۔ صدر ڪراچي بار عامر نواز وڙائچ چيو آهي ته 3 جنوري تي ڌرين ۾ ڪراچي بار ۾ ڳالهين جو سلسلو شروع ٿيندو ۽ معاملو ڳالهين ذريعي حل ڪيو ويندو۔
صدر بار وضاحت ڪئي ته جيڪڏهن ڳالهين ۾ ڪاميابي نه ملي ته ٻيهر احتجاج ٿي سگهي ٿو، جڏهن ته ڳالهين تائين ڌريون سوشل ميڊيا تي ڪا پوسٽ شيئر نه ڪنديون۔
ياد رهي ته ڪراچي سٽي ڪورٽ جي اڱڻ ۾ رجب بٽ تي ڪجهه وڪيلن تشدد ڪيو هو، جنهن جي وڊيو منظرعام تي آئي۔ بعد ۾ رجب بٽ جي وڪيل جي درخواست تي ايڊووڪيٽ رياض سولنگي، ايڊووڪيٽ عبدالفتاح ۽ ٻين خلاف ڪيس داخل ڪيو ويو۔
انهيءَ عمل تي ڪراچي بار ۽ سنڌ بار ڪائونسل سخت احتجاج ڪيو، عدالتي ڪارروائين جو بائيڪاٽ ڪيو ۽ پوليس خلاف مظاهرا به ڪيا۔ وڪيلن ايم اي جناح روڊ تي ڇهه ڪلاڪ کان وڌيڪ ڌرڻو ڏنو ۽ سٽي ڪورٽ ٿاڻي تي چڙهائي جو الزام به سامهون آيو۔ سنڌ بار ڪائونسل ڪيس داخل ڪرڻ کي “ٻيا مقصد” قرار ڏيندي آءِ جي سنڌ کان مطالبو ڪيو ته رجب بٽ ۽ ٻين خلاف به ڪيس داخل ڪيو وڃي۔
