اسلام آباد(ويب ڊيسڪ) فنگر پرنٽس جي تصديق ۾ شهرين کي پيش ايندڙ مسئلن کان پوءِ نادرا وڏي سهولت شروع ڪرائي ڇڏي آهي۔
نادرا پاران چهري جي سڃاڻپ تي ٻڌل بائيو ميٽرڪ تصديق جو نظام شروع ڪيو ويو آهي، جنهن سان بزرگن يا طبي مسئلن سبب فنگر پرنٽس جي تصديق ۾ ايندڙ ڏکيائي ختم ٿي ويندي۔
ترجمان موجب وزيراعظم ۽ وفاقي وزير داخلا جي هدايت تي قومي سڃاڻپ ڪارڊ جي قانونن ۾ ترميم ڪئي وئي آهي ۽ بائيو ميٽرڪ جي تعريف کي وسيع ڪيو ويو آهي۔ هاڻي “پاڪ آءِ ڊي” موبائل ايپ ذريعي چهري جي سڃاڻپ سان بائيو ميٽرڪ تصديق ممڪن بڻائي وئي آهي۔
20 جنوري کان سڀني نادرا مرڪزن تي چهري جي سڃاڻپ تي ٻڌل بائيو ميٽرڪ سرٽيفڪيٽ جاري ڪيو ويندو، جيڪو معمولي فيس تي حاصل ڪري سگهجي ٿو۔ فنگر پرنٽس جي تصديق نه ٿيڻ جي صورت ۾ شهري ويجهي نادرا مرڪز تي وڃي چهري جي سڃاڻپ مڪمل ڪندو ۽ نادرا سرٽيفڪيٽ جاري ڪندو۔
هن سرٽيفڪيٽ تي تصوير، سڃاڻپ ڪارڊ نمبر، نالو، والد جو نالو، منفرد ٽريڪنگ آءِ ڊي ۽ ڪيو آر ڪوڊ هوندو، جيڪو 7 ڏينهن تائين استعمال جوڳو رهندو۔
ترجمان ٻڌايو ته نادرا هن نظام جي لاڳو ڪرڻ لاءِ مڪمل تيار آهي ۽ سرڪاري ۽ نجي ادارن کي ضروري قدم کڻڻ جي درخواست ڪئي وئي آهي۔ 20 جنوري کان پوءِ جيڪڏهن سهولت بابت ڪا شڪايت ٿئي ته لاڳاپيل ادارن کي اطلاع ڏئي سگهجي ٿو۔
ڊيجيٽل آءِ ڊي جاري ڪرڻ کانپو3 هي سهولت “پاڪ آءِ ڊي” موبائل ايپ تي به دستياب هوندي۔
