ڪراچي (اسٽاف رپورٽر) انسپيڪٽر جنرل (آئي جي) پوليس سنڌ غلام نبي ميمڻ ملازمت جو مدو مڪمل ٿيڻ بعد ريٽائر ٿي ويو، جڏهن ته ڪراچي پوليس چيـف جاويد عالم اوڍو کي آئي جي سنڌ جي اضافي چارج ڏني وئي آهي۔
غلام نبي ميمڻ پنهنجي سروس مڪمل ڪري ريٽائرڊ ٿي ويو، پر سندن ريٽائرمنٽ کان اڳ نئون آئي جي مقرر نه ٿي سگهيو۔ سنڌ حڪومت نوٽيفڪيشن جاري ڪندي ڪراچي پوليس چيـف ايڊيشنل آئي جي جاويد عالم اوڍو کي اضافي چارج ڏني آهي، جنهن بعد هن وقتي آئي جي سنڌ جي حيثيت سان عهدو سنڀالي ورتو۔
سينٽرل پوليس آفيس ڪراچي ۾ ڪمانڊ جي تبديليءَ جي تقريب منعقد ٿي، جتي غلام نبي ميمڻ پنهنجيون ذميواريون ۽ ڪمانڊ اسٽڪ جاويد عالم اوڍو حوالي ڪئي۔
غلام نبي ميمڻ، جيڪي پوليس سروس آف پاڪستان ۾ گريڊ 22 جي آفيسر طور ريٽائر ٿيا، 1 جنوري 1966 تي بدين ۾ پيدا ٿيا ۽ 19 آڪٽوبر 1991 تي پوليس ۾ شموليت اختيار ڪئي۔ 1997 ۾ کين گريڊ 17 کان 18 ۾ ترقي ملي۔
هن 1997 کان 2006 تائين مختلف عهدن تي خدمتون سرانجام ڏنيون، جن ۾ ايس پي گھوٽڪي، ايس پي خيرپور، ايس ايس پي ملير ۽ لاڙڪاڻو، ڊي پي او لاڙڪاڻو، اي ڊي آئي جي اسٽيبلشمينٽ ڪراچي، ايڊيشنل سيڪريٽري ٽو چيـف منسٽر سنڌ، ڊائريڪٽر اينٽي ڪرپشن ۽ اي ڊي آئي جي آپريشنز سي سي پي ڪراچي شامل آهن۔
2006 ۾ کين گريڊ 19 ۾ ترقي ملي، جنهن بعد هو ڊي پي او گھوٽڪي طور مقرر ٿيا ۽ ٻن ڀيرا انٽيليجنس بيورو ۾ به خدمتون سرانجام ڏنيون۔ 2010 ۾ کين گريڊ 20 ۾ ترقي ملي، جتي هو ڊي آئی جي ساوٿ ۽ ڊي آئي جي هيڊڪوارٽرز سينٽرل پوليس آفيس طور ڪم ڪندا رهيا۔ 2018 ۾ کين ايڊيشنل آئي جي گريڊ 22 ۾ ترقي ڏني وئي، جتي هو ٻه ڀيرا ڪراچي پوليس چيـف ۽ ايڊيشنل آئي جي اسپيشل برانچ طور مقرر ٿيا۔
غلام نبي ميمڻ ٻه ڀيرا آئي جي سنڌ طور مقرر ٿيا۔ پهريون ڀيرو 3 جون 2022 کان 19 آگسٽ 2023 تائين ۽ ٻيهر 25 مارچ 2024 کان 31 ڊسمبر 2025 تائين هن عهدي تي خدمتون سرانجام ڏنيون۔
سندن ريٽائرمنٽ کان پوءِ جاويد عالم اوڍو قائم مقام آئي جي سنڌ طور ذميواريون سنڀالي ورتيون آهن۔
