ممبئي (ويب ڊيسڪ) ڀارتيه جنتا پارٽي (بي جي پي) جي تڪراري ۽ انتها پسند اڳواڻ سنگيت سوم بالي ووڊ جي مشهور ناليواري اداڪار شاهه رخ خان خلاف سخت زبان استعمال ڪندي کين ’غدار‘ قرار ڏنو آهي۔ هي بيان تڏهن سامهون آيو جڏهن شاهه رخ خان جي ملڪيت آءِ پي ايل ٽيم ڪولڪتا نائٽ رائيڊرز بنگلاديش جي فاسٽ بالر مستفيض الرحمان کي پنهنجي ٽيم ۾ شامل ڪيو۔
اتر پرديش جي قانون ساز اسيمبلي جي اڳوڻي ميمبر سنگيت سوم ميرٺ ۾ هڪ جلسي دوران چيو ته شاهه رخ خان بنگلاديشي رانديگر کي خريد ڪري ملڪ سان غداري ڪئي آهي۔ سندس موقف هو ته هڪ طرف بنگلاديش ۾ هندن تي تشدد جون خبرون اچي رهيون آهن ۽ ٻي طرف ڀارتي ليگ ۾ انهن رانديگرن کي ڪروڙين رپيا ڏئي خريد ڪيو پيو وڃي۔
سوم الزام لڳايو ته شاهه رخ خان مستفيض الرحمان کي آءِ پي ايل 2026 جي نيلامي دوران لڳ ڀڳ 9 ڪروڙ رپين ۾ خريد ڪيو، جيڪو سندس خيال ۾ قبول جوڳي ناهي۔ هن سخت لفظن ۾ چيو ته اهڙن ماڻهن کي ڀارت ۾ رهڻ جو ڪو حق ناهي جيڪي ملڪ جي جذبات جي ابتڙ فيصلا ڪن ٿا۔
بي جي پي اڳواڻ شاهه رخ خان کي مخاطب ڪندي چيو ته توهان جيڪو مقام ۽ دولت حاصل ڪئي آهي، اها هن ملڪ جي بدولت آهي، پر ان جي باوجود توهان اهڙا قدم کڻي رهيا آهيو جيڪي غداري جي برابر آهن۔ سندس چوڻ هو ته دولت ته ڀارت مان حاصل ڪئي پئي وڃي، پر فائدو اهڙن ماڻهن کي ڏنو پيو وڃي جن تي سوال اٿن ٿا۔
سنگيت سوم وڌيڪ سخت بيان ڏيندي دعويٰ ڪئي ته جيڪڏهن مستفيض الرحمان جهڙا رانديگر، جن کي 16 ڊسمبر تي ٿيل آءِ پي ايل 2026 جي نيلامي ۾ 9.2 ڪروڙ رپين ۾ خريد ڪيو ويو، ڀارت آيا ته هو ايئرپورٽ کان ٻاهر نه نڪري سگهندا۔
هن بيان سوشل ميڊيا ۽ سياسي حلقن ۾ نئين بحث کي جنم ڏنو آهي، جتي هن معاملي کي رڳو راند نه پر سياست ۽ انتهاپسندي جي تناظر ۾ ڏٺو پيو وڃي۔
