اسلام آباد(ويب ڊيسڪ) ڊسمبر 2025 ۾ پاڪستان جي تاريخ جي بلند ترين ٽيڪس وصولي تي ناڻي واري وفاقي سينيٽر محمد اورنگزيب پاران فيڊرل بورڊ آف ريونيو (ايف بي آر) جي ڪارڪردگي کي ساراهيو ويو ۽ ٽيڪس ڪليڪشن ۾ وڌيڪ اضافي جي هدايت ڪئي وئي.
ناڻي واري وزير چيو ته گذريل 18 مهينن ۾ واضح اڳڀرائي ٿي آهي، جنهن جي نتيجي ۾ ڊسمبر 2025 جون وصوليون حوصلو ڏيندڙ آهن. هن وضاحت ڪئي ته معيشيت جي ڊجيٽلائيزيشن، ڪيش ليس ٽرانزيڪشن جي واڌ ۽ ڪاروباري سرگرمين کي متاثر نه ڪندي مضبوط قانوني حڪمت عملي عملي ۽ پائيدار نتيجا ڏئي رهي آهي.
بريفنگ ۾ ٻڌايو ويو ته ايف بي آر ڊسمبر 2025 ۾ 1,427.1 ارب رپيا ٽيڪس وصول ڪيو، جيڪو مقرر ڪيل 1,446 ارب رپين جي هدف جو 99 سيڪڙو آهي. هي ڪنهن به سال جي ڊسمبر ۾ سڀ کان وڌيڪ ٽيڪس وصولي آهي، جيڪا بهتر ٽيڪس تعميل ۽ مؤثر لاڳو ٿيڻ جو ثبوت آهي.
