اسلام آباد(ويب ڊيسڪ) پاڪستان ۾ وڏين اسپتالن جي رش گهٽائڻ لاءِ ٽيلي ميڊيسن سسٽم جي باقاعده شروعات ڪئي وئي آهي۔ صحت واري وزارت جي تعاون سان “صحت ڪهاڻي” جي انتظام هيٺ پهرئين هيلٿ ڪيئر سينٽر جو افتتاح ڪيو ويو، جنهن ۾ صحت واري وفاقي وزير مصطفيٰ ڪمال شرڪت ڪئي۔
افتتاحي تقريب ۾ صحت واري وزير چيو ته اڄ صحت جي شعبي ۾ هڪ اهم سنگ ميل آهي، ڇو ته سرڪاري ۽ نجي اسپتالن ۾ سياسي جلسن جيان ميڙ نظر اچي ٿو، جنهن جي بنيادي سبب پرائمري ۽ سيڪنڊري هيلٿ ڪيئر سسٽم جي کوٽ آهي۔ هن وضاحت ڪئي ته پرائمري هيلٿ سسٽم جو مؤثر متبادل ٽيلي ميڊيسن آهي، جيڪو هاڻي وفاقي بنيادي صحت مرڪزن ۾ شروع ڪيو ويو آهي۔
اسلام آباد جي گوگينه ڳوٺ ۾ ٽيلي ميڊيسن پراجيڪٽ جي باقاعده شروعات ٿي چڪي آهي، جتي “صحت ڪهاڻي” ادارو ڊجيٽل صحت جون سهولتون فراهم ڪندو۔ صحت واري وزير ٻڌايو ته وڏين اسپتالن ۾ ايندڙ 70 سيڪڙو مريضن کي بنيادي صحت مرڪزن ڏانهن رجوع ڪرڻ گهرجي۔
هن وڌيڪ چيو ته اسلام آباد ۾ 6 ۽ ڪراچي ۾ 4 هنڌن تي ٽيلي ميڊيسن سسٽم لڳايو پيو وڃي، جتي مريضن کي آن لائن ڪيمرن ذريعي هڪ ئي وقت 3 جنرل فزشن ڏسندا، جڏهن ته مجموعي طور تي 18 ڊاڪٽر آن لائن موجود هوندا۔
صحت واري وفاقي وزير موجب ٽيلي ميڊيسن سسٽم تحت مريضن کي آن لائن دوا جي پرچي جاري ڪئي ويندي ۽ ساڳئي هنڌ کان دوا فراهم ڪئي ويندي، جنهن سان وڏن اسپتالن جي رش گهٽجڻ شروع ٿيندي۔ هن چيو ته ڊاڪٽرن جي وڏي تعداد، خاص طور تي عورت ڊاڪٽرن، جيڪي هن وقت پريڪٽس نٿيون ڪن، هاڻي گهر ويٺي مريضن جو علاج ڪري سگهنديون۔
مصطفيٰ ڪمال چيو ته ڪجهه مهينا اڳ هي خواب ڏٺو ويو هو ۽ اڄ ان جو پهريون قدم کڻيو ويو آهي۔ هن ٻڌايو ته پهريون بنيادي صحت مرڪز (بي ايڇ يو) افتتاح ڪيو ويو آهي ۽ هاڻي هر هفتي هڪ نئون بي ايڇ يو کوليو ويندو۔ هن وڌيڪ چيو ته انهن مرڪزن ۾ صبح کان شام 6 وڳي تائين مريضن جو معائنو ٿيندو ۽ هو پاڻ به سرپرائز وزٽ ڪندو رهندو۔
