سکر (بيورو رپورٽ): گمبٽ انسٽيٽيوٽ آف ميڊيڪل سائنسز (گمس) هڪ تاريخي سنگ ميل حاصل ڪندي 1100 کان وڌيڪ ڪامياب ليور ٽرانسپلانٽ ۽ 200 کان وڌيڪ بون ميرو ٽرانسپلانٽ بلڪل مفت ۾ سرانجام ڏنا آهن، جنهن جو مثال سڄي ايشيا ۾ نه ٿو ملي۔
انسٽيٽيوٽ جي ڊائريڪٽر ڊاڪٽر رحيم بخش ڀٽي هن ڪاميابي کي سنڌ حڪومت جي عوام دوست پاليسين جو نتيجو قرار ڏيندي چيو ته گمس ۾ پاڪستان جي سڀني صوبن سميت وڏن شهرن ڪراچي، لاهور، ڪوئٽه، پشاور، ڪشمير ۽ افغانستان کان آيل مريضن کي بين الاقوامي معيار مطابق بنا معاوضي علاج فراهم ڪيو پيو وڃي۔
ڊاڪٽر ڀٽي چيو ته هي پاڪستان جو هڪ تاريخي ڪارنامو آهي، جتي پيچيده ليور ٽرانسپلانٽ عوامي سيڪٽر ۾ ڪاميابيءَ سان ڪيا پيا وڃن، جنهن جو ڪو مثال خطي جي ڪنهن ملڪ ۾ موجود ناهي۔ هن ٻڌايو ته ليور ٽرانسپلانٽ ڊپارٽمينٽ جنوري 2016 ۾ قائم ٿيو ۽ اپريل ۾ پهريون ڪامياب ٽرانسپلانٽ ڪيو ويو، ابتدا ۾ جرمني ۽ ٻين ملڪن جا ماهر سرجن شامل هئا، پر هاڻي پاڪستاني سرجن پاڻ مڪمل سرجريون سرانجام ڏئي رهيا آهن۔
گمس جو ليور سينٽر ملڪ جو سڀ کان وڏو پروگرام آهي، جنهن ۾ 60 بسترن وارو وارڊ، 30 بسترن تي مشتمل آءِ سي يو، 10 بسترن تي ايمرجنسي، 6 جديد آپريشن ٿيٽر ۽ 80 ڪمرا شامل آهن۔ ڊاڪٽر ڀٽي موجب ليور ٽرانسپلانٽ جي ڪاميابيءَ جي شرح 90 سيڪڙو آهي، جيڪا ترقي يافته ملڪن جي سطح تي آهي۔
ڊاڪٽر ڀٽي پنهنجي روزاني دوري دوران بون ميرو ٽرانسپلانٽ سينٽر ۾ ڪينسر ۾ مبتلا لڳ ڀڳ سئو مريضن سان ملاقات ڪئي ۽ کين قيمتي دوائون ۽ انجيڪشنون مفت ۾ فراهم ڪيون، جن مان هڪ انجيڪشن جي قيمت مارڪيٽ ۾ هڪ لک روپين کان وڌيڪ آهي۔ هن چيو ته بون ميرو ٽرانسپلانٽ سينٽر خون جي بيمارين ۽ ڪينسر جي مريضن لاءِ اميد جي ڪرن بڻجي چڪو آهي، جتي 200 کان وڌيڪ ڪامياب ٽرانسپلانٽ سرانجام ڏنا ويا آهن، ۽ هي سينٽر پاڪستان ۾ سيلولر ٿراپيءَ جو اهم مرڪز بڻجي ويو آهي۔
ڊاڪٽر ڀٽي جو چوڻ هو ته گمس پنهنجي هيلٿ ڪيئر سسٽم کي تيزيءَ سان جديد بڻايو آهي، جتي بين الاقوامي معيار مطابق طبي سهولتون فراهم ڪيون پيون وڃن۔ خيرپور ضلعي جي تعلقي گمبٽ ۾ قائم هي انسٽيٽيوٽ انسانيت ۽ همدردي جي اصل روح جي نمائندگي ڪري رهيو آهي، جتي بنا نسل، مذهب ۽ علائقي جي فرق جي خدمت ڪئي پئي وڃي۔
گمس ۾ هن وقت تائين 1100 ليور ۽ 200 کان وڌيڪ بون ميرو ٽرانسپلانٽ بنا ڪنهن فيس جي ڪاميابيءَ سان مڪمل ڪيا ويا آهن، ۽ هي ادارو پاڪستان ۾ هڪ ماڊل هيلٿ ڪيئر انسٽيٽيوٽ طور سڃاتو وڃي ٿو۔
