ڪراچي(ويب ڊيسڪ) سنڌ جي وڏي وزير سيد مراد علي شاهه چيو آهي ته ڪراچي کي دنيا جي بهترين شهرن ۾ شامل ڪرڻ لاءِ 84 ارب 79 ڪروڙ 60 لک رپين جو پيڪيج ڏنو پيو وڃي، جڏهن ته 26 ارب 20 ڪروڙ رپيا اضافي طور منظور ڪيا ويا آهن. هن ڳالهه جو اظهار فرنٽيئر ورڪس آرگنائيزيشن (ايف ڊبليو او) جي وفد سان ملاقات دوران ڪيو، جنهن جي سربراهي ڊي جي ميجر جنرل عبدالسميع ڪري رهيا هئا. ملاقات ۾ وزير بلديات سيد ناصر حسين شاهه، ميئر ڪراچي مرتضيٰ وهاب، ۽ ٻين اعليٰ عملدارن شرڪت ڪئي.
وڏي وزير چيو ته ڪراچي جي ترقي لاءِ جامع منصوبا تيار ڪيا ويا آهن، جن ۾ وڏن انفراسٽرڪچر پروجيڪٽس شامل آهن. اهم منصوبا هيٺيان آهن:
- ايم نائن جناح ايونيو کان شاهراهه فيصل تائين روڊ جي تعمير، جيڪو سپر هاءِ وي سان ڳنڍيل هوندو.
- ملير هالٽ کان شاهراهه فيصل تائين انڊر پاس، ٽريفڪ جي رڪاوٽ ختم ڪرڻ لاءِ.
- ايئرپورٽ کان اسٽارگيٽ تائين فلائي اوور، جنهن سان ايئرپورٽ کان شاهراهه فيصل تائين سڌي رسائي ممڪن ٿيندي.
- وائي جنڪشن کان مڇلي چوک (هاڪس بي روڊ) تائين روڊ جي تعمير، ڪمرشل ۽ هيوي ٽريفڪ لاءِ.
- مسرور بيس کان ٽرڪ اسٽينڊ تائين روڊ جي تعمير.
- سهراب گوٺ تي فلائي اوور، جيڪو شهر جو گيٽ وي آهي ۽ ٽريفڪ جو دٻاءُ گهٽ ڪندو.
مراد علي شاهه ٻڌايو ته 7 وڏن منصوبن لاءِ 84.7 ارب رپيا رکيا ويا آهن، جڏهن ته شهر جي مختلف علائقن ۾ 443 اندروني روڊن کي تعمير ڪيون وينديون. ٽريفڪ مينيجمينٽ لاءِ 9 منصوبا ۽ ڪي ايم سي جي 26 روڊن جي تعمير پڻ شامل آهي.
هن وڌيڪ چيو ته پارڪن، فلائي اوورن ۽ سڙڪن جي خوبصورتيءَ جا منصوبا به جاري آهن. گڏوگڏ 9 اهم ترقياتي منصوبا، 10 علائقن ۾ روڊن جي تعمير ۽ 7 روڊن جي بييوٽيفڪيشن به ڪئي ويندي.
اجلاس ۾ فيصلو ڪيو ويو ته ايف ڊبليو او جا انجنيئرز، بلديات کاتي ۽ ڪي ايم سي جا اعليٰ عملدار گڏجي منصوبا ڊزائن ڪندا. وزيراعليٰ هدايت ڪئي ته ڊزائن ۽ يوٽيلٽيز جي منتقلي جا مسئلا فروري 2026 تائين حل ڪيا وڃن ۽ مارچ 2026 کان ترقياتي ڪم شروع ڪيا وڃن.
