اسلام آباد(ويب ڊيسڪ) وزيراعظم شهباز شريف حڪومت ۽ پاڪستان تحريڪ انصاف (پي ٽي آءِ) وچ ۾ ڳالهين لاءِ گرين سگنل ڏئي ڇڏيو آهي. ذريعن موجب وزيراعظم شهباز شريف اسپيڪر قومي اسيمبلي سردار اياز صادق کي هدايت ڪئي آهي ته هو ان سلسلي ۾ اڳڀرائي ڪن، جڏهن ته حڪومتي وفد اسپيڪر جي درخواست تي ڳالهين لاءِ تيار آهي.
حڪومتي ذريعن جو چوڻ آهي ته ڳالهين جو عمل صرف پي ٽي آءِ جي چونڊيل نمائندن سان ٿيندو، اڻ چونڊيل شخصيتن سان ڳالهه ٻولهه نه ڪئي ويندي. ٻئي پاسي اسپيڪر آفيس جي ذريعن موجب اڃا تائين پي ٽي آءِ جي ڪنهن به اڳواڻ طرفان باضابطه رابطو نه ڪيو ويو آهي.
اسپيڪر آفيس ٻڌايو ته سردار اياز صادق پارليماني ڪميٽي کي برقرار رکيو آهي ۽ جيڪڏهن اپوزيشن راضي ٿي ته فوري طور تي ڪميٽي جو اجلاس سڏيو ويندو. پارليماني ذريعن جو چوڻ آهي ته اسپيڪر جي آڇ باوجود اپوزيشن طرفان اڃا تائين ڪو جواب نه مليو آهي، البت اسپيڪر پي ٽي آءِ کي پنهنجي چيمبر ۾ اچڻ جي دعوت ڏني آهي.
ياد رهي ته پي ٽي آءِ جي اسپيڪر سان آخري ملاقات محمود اچڪزئي کي اپوزيشن ليڊر بڻائڻ جي حوالي سان ٿي هئي. هاڻي اميد آهي ته نئين سياسي صورتحال ۾ حڪومت ۽ پي ٽي آءِ جي وچ ۾ ڳالهين جو عمل اڳتي وڌي سگهي ٿو.
