ڪراچي (اسٽاف رپورٽر) ڪراچي اوپن انٽرنيشنل اسڪواش ٽورنامينٽ ۾ شرڪت ڪندڙ انگلينڊ جي اسڪواش اسٽار ٽوري ملڪ، شهر جي مداحن جي محبتن جو مرڪز بڻجي ويون.
https://www.youtube.com/watch?v=YX35YnDjn6g
ڊي فنس اٿارٽي ڪِريڪ ڪلب جي آصف نواز اسڪواش ڪمپليڪس ۾ ٽوري ملڪ مداحن سان ملي جلي وئي، ننڍڙي ٻارڙي کي هنج ۾ کڻي راند ڪندي ۽ پاڪستاني عورتن سان چرچا ڪندي، هنن جي دلين ۾ جاءِ ٺاهي ورتي.
21 ورهين جي ٽوري ملڪ، پاڪستان ڄائي برطانوي شهري ڪامران ملڪ جي ڌيءَ ۽ انگلينڊ سان تعلق رکندڙ سوزن ملڪ جي نياڻي آهي. عالمي اسڪواش ۾ “ملڪ فيملي” جي نالي سان مشهور هن خاندان جا ٻيا ٻار به اسڪواش کيڏن ٿا.
ٽوري ملڪ 2019ع ۾ صرف 15 ورهين جي عمر ۾ پروفيشنل اسڪواش رانديگر بڻجي وئي هئي. هوءَ اڄ تائين 18 انٽرنيشنل مقابلي جي فائنل تائين رسائي حاصل ڪري چڪي آهي ۽ 9 ٽائٽلز پنهنجي نالي تي ڪري چڪي آهي.
ٽوري ملڪ ڪراچي جي معتدل موسم ۽ روايتي ميزباني جي واکاڻ ڪندي چيو ته: “پاڪستان منهنجو ٻيو گهر آهي، والد جي ڪري منهنجو هن ملڪ سان گهرو تعلق آهي، هتي اچڻ سان هميشه اهو محسوس ٿيندو آهي ڄڻ مان پنهنجي گهر ۾ آهيان. ڪراچي جا ماڻهو تمام گهڻو پيار ڪندڙ آهن ۽ هتي ملندڙ عزت ۽ محبت مون لاءِ وڏي خوشي جو سبب آهي.”
عالمي اعزاز حاصل ڪرڻ جي خواب سان اڳتي وڌندڙ ٽوري ملڪ جو چوڻ آهي ته هوءَ مسلسل محنت، عزم ۽ جذبي سان مستقبل ۾ وڌيڪ ڪاميابين لاءِ پراميد آهي.
