رحيم يار خان (ويب ڊيسڪ) پنجاب پوليس کي ڪچي جي علائقن ۾ آپريشن دوران وڏي ڪاميابي ملي آهي، هڪ ڪروڙ رپيا انعام وارو بدنام ڌاڙيل ميـرا لٺاڻي پنهنجي ساٿين سميت هٿيار ڦٽا ڪري پوليس آڏو سرينڊر ڪري ڇڏيو.
ترجمان پنجاب پوليس موجب پنجاب حڪومت خطرناڪ اشتھاري مجرم جي مٿي تي هڪ ڪروڙ رپيا انعام مقرر ڪيو هو. سنگين ڏوهن ۾ ملوث ڌاڙيل فدا عرف راٺوڙ لٺاڻي ۽ زلفي لٺاڻي به پوليس آڏو سرينڊر ڪري ڇڏيو. رحيم يار خان پوليس جي گِهيري سبب ميـرا لٺاڻي ۽ سندس ساٿي هٿيار ڦٽا ڪرڻ تي مجبور ٿيا.
ترجمان موجب ڊي پي او رحيم يار خان عرفان علي سمون جي اڳواڻي ۾ ڪچي ۾ انٽيليجنس بيسڊ ٽارگيٽيڊ ڪارروايون جاري آهن. گرفتار ٿيل ڊاڪو قتل، پوليس تي حملا، اغوا، ڀنگ ۽ ٻين سنگين ڏوهن ۾ ملوث ۽ رڪارڊ يافته آهي.
آءِ جي پنجاب ڊاڪٽر عثمان انور بدنام ڌاڙيل ۽ سندس ساٿين جي سرينڊر تي ڊي پي او رحيم يار خان ۽ پوليس ٽيم کي شاباش ڏني.
ڊي پي او رحيم يار خان چيو ته جيڪي هٿيار اڇلائي پرامن زندگي ڏانهن اچڻ چاهين ٿا، انهن لاءِ رستا کُليل آهن ۽ کين بهتر زندگي گذارڻ جو پورو موقعو ڏنو ويندو.
