ڪراچي (بيورو رپورٽ) ــ پاڪ بحريه طرفان شمالي بحيره عرب ۾ هڪ جامع سامونڊي مشق دوران زمين کان هوا تائين مار ڪندڙ جديد ميزائل جو ڪامياب تجربو ڪيو ويو، جنهن سان پاڪستان نيوي پنهنجي آپريشنل تياري ۽ جنگي صلاحيتن جو شاندار مظاهرو ڪيو.
آءِ ايس پي آر جي بيان موجب، بدلجندڙ سامونڊي جنگي حڪمتِ عملي جي گهرجن تحت هن مشق ۾ روايتي ۽ بغير پائلٽ نظامن جي صلاحيتن کي آزمائيو ويو. مشق دوران پاڪستان نيوي جديد فضائي دفاعي نظام جو مظاهرو ڪندي عمودي لانچنگ سسٽم مان ايل واءِ–80 (اين)ميزائل جو ڪامياب لائيو فائر ڪيو، جيڪو وڌايل فاصلي تي فضائي هدف کي درستگي سان تباهه ڪرڻ ۾ ڪامياب ٿيو.
بيان ۾ وڌيڪ چيو ويو ته مشق ۾ جديد لوئٽرنگ ميونشن استعمال ڪندي پاڻي جي سطحِ جي هدف کي به ڪاميابي سان نشانو بڻايا ويا، جنهن سان پاڪ بحريه جي پريسيزن اسٽرائڪ صلاحيت جو واضع ثبوت مليو.
ترجمان موجب، جديد سامونڊي جنگ ۾ اهميت رکندڙ ان مينڊ سرفيس ويسل(يو ايس وي) جا کليل سمنڊ ۾ ڪامياب آزمائشي تجربا به ڪيا ويا، جن دوران پليٽ فارم جي تيز رفتار ڪارڪردگي، ڦڙتي، درست نيويگيشن ۽ سخت موسمي حالتن ۾ مؤثر صلاحيتن جو مظاهرو ٿيو. يو ايس وي کي گهٽ خطري ۽ وڌيڪ اثر رکندڙ اسٽيٿ ٽيڪٽيڪل انٽرسيپٽر قرار ڏنو ويو.
مشق جو مشاهدو ڪمانڊر پاڪستان فليٽ ڪيو، جڏهن ته چيف آف دي نيول اسٽاف ايڊمرل نويد اشرف (نشانِ امتياز ملٽري) آفيسرن ۽ جوانن جي پيشه ورانه مهارت ۽ عملي قابليت کي ساراهيو. ترجمان چيو ته پاڪ بحريه هر حال ۾ ملڪ جي بحري دفاع ۽ قومي سامونڊي مفادن جي حفاظت کي يقيني بڻائيندي رهندي.
