واشنگٽن: (ويب ڊيسڪ) آمريڪي ٽي وي صدر ٽرمپ جي ايران تي زور دار حملو ڪرڻ جي امڪان جو اظهار ڪيو آهي۔ مغربي ملڪن ايران مان پنهنجا شهري ڪڍڻ شروع ڪري ڇڏيا آهن، آمريڪي فوجي اڏن تي نفري ۾ به گهٽتائي ڪئي وئي آهي، جڏهن ته ايران جي پرڏيهي وزير ملڪ ۾ امن ۽ امان جو يقين ڏياريو آهي۔
آمريڪي ٽي وي موجب صدر ٽرمپ ايران تي زور دار ۽ فيصلائتو حملو ڪرڻ چاهي ٿو ۽ هو ڊگهي جنگ بدران مختصر پر فيصلائتي ڪارروائي جا خواهشمند آهن۔
ايران پنهنجي هوائي حدون بند ڪرڻ کان پوءِ ڪجهه وقت لاءِ جزوي طور بحال ڪيون، جڏهن ته پرڏيهي وزير چيو ته ملڪ ۾ امن قائم آهي، ماڻهن کي ڦاسي ڏيڻ جو سوال ئي پيدا نٿو ٿئي، مظاهرين کي سخت سزائون ڏيڻ جا الزام بي بنياد مغربي پروپيگنڊا آهن۔
عباس عراقچي جي تنبيهه
ايراني پرڏيهي وزير خبردار ڪيو ته جون جهڙي غلطي ٻيهر نه ورجائجي، نه ته ساڳيو نتيجو نڪرندو جيڪو اڳ نڪتو هو۔ هن چيو ته اسان جو عزم بمباري سان نٿو ٽوڙي سگهجي. مظاهرن ۾ شامل عنصرن کي ٻاهرين ملڪ کان ڪنٽرول ڪيو پئي ويو، ڪجهه مظاهرين پوليس تي فائرنگ ڪئي، داعش طرز جون دهشتگرداڻيون ڪارروايون ٿيون ۽ پوليس اهلڪارن کي زنده ساڙيو ويو۔
اسرائيل ۾ دفاعي تياريون
اسرائيلي ميڊيا موجب آرمي چيف فوري دفاعي تيارين جو حڪم ڏنو آهي، اتر اسرائيل سميت مختلف علائقن ۾ بم شيلٽر کوليا ويا آهن۔ اسرائيل کي اميد آهي ته آمريڪا ايران تي حملن کان اڳ وارننگ ڏيندو۔
برطانوي خبر ايجنسي موجب آمريڪا ايران ۾ 50 هدف نشانو بڻائي سگهي ٿو، جن ۾ پاسداران انقلاب جو هيڊڪوارٽر ۽ فوج جا 23 اڏا شامل آهن۔
ايران جي تنبيهه
آمريڪا وچ اوڀر ۾ پنهنجن فوجي اڏن مان ڪجهه اهلڪار واپس گهرايا آهن، ڇوتہ ايران پاڙيسري ملڪن کي خبردار ڪيو آهي ته جيڪڏهن آمريڪا حملو ڪيو ته خطي ۾ موجود آمريڪي فوجي اڏا نشانو بڻايا ويندا۔ قطر به تصديق ڪئي آهي ته العُديد ايئربيس مان عملي ۾ گهٽتائي علائقائي تڪرار سبب ڪئي پئي وڃي۔
مغربي فوجي عملدارن موجب سڀ اشارا ڏيکارين ٿا ته آمريڪي حملو جلد ٿي سگهي ٿو، ٻن يورپي عملدارن چيو ته فوجي مداخلت ايندڙ 24 ڪلاڪن ۾ ٿي سگهي ٿي، جڏهن ته هڪ اسرائيلي عملدار موجب لڳي ٿو صدر ٽرمپ فيصلو ڪري چڪا آهن۔
رضا پهلوي بابت ٽرمپ جو اظهارِ عدم اعتماد
صدر ڊونلڊ ٽرمپ آمريڪا ۾ رهندڙ 65 ورهين جي رضا پهلوي بابت چيو ته هو سٺو لڳي ٿو پر خبر ناهي ته پنهنجي ملڪ ۾ ڪيئن ڪارڪردگي ڏيکاريندو۔ هن چيو ته اڃا اسان ان مرحلي تي پهتا ئي نه آهيون، ۽ جيڪڏهن ملڪ انهن کي قبول ڪري ته مونکي ڪو اعتراض نه هوندو۔
هوائي اُڏامون ۽ هوائي حدون
جرمن ايئرلائن اسرائيل لاءِ رات جون اڏامون 19 جنوري تائين بند ڪري ڇڏيون آهن، ايئر انڊيا به ايران جي هوائي حدن جو استعمال بند ڪري ڇڏيو آهي، جڏهن ته پاڪستاني اختيارين موجب ايران جي هوائي حدن جي بندش سان پاڪستاني اُڏامون متاثر نه ٿينديون۔
ايران مان پرڏيهين جي منتقلي
ايران ۾ سيڪيورٽي صورتحال سبب آمريڪا ۽ برطانيا کان پوءِ اسپين، پولينڊ ۽ اٽلي به پنهنجن شهرين کي ايران ڇڏڻ جي هدايت ڪئي آهي۔ اٽلي جي پرڏيهي وزارت موجب ايران ۾ لڳ ڀڳ 600 اطالوي شهري موجود آهن، جن مان گهڻا تهران ۾ رهن ٿا۔ بيان ۾ چيو ويو ته سيڪيورٽي صورتحال جي پيش نظر ايران مان نڪرڻ جي ڪوشش ڪريو۔ پولينڊ جي وزارتِ خارجہ به سماجي ميڊيا پليٽفارم ’ايڪس‘ تي پنهنجي شهرين کي ايران ڇڏڻ جي هدايت ڪئي آهي۔ برطانيا پنهنجو سفارتي عملو واپس گهرايو ۽ ايران مان سفير کي به واپس گهرايو۔
