ڪراچي (ويب ڊيسڪ) پاڪستان ٽيليويزن جي خبرنامي سان سڃاڻپ حاصل ڪندڙ سينيئر نيوز اينڪر ۽ براڊڪاسٽر عشرت فاطمه ريڊيو پاڪستان سان پنهنجي 45 سالن جي ڊگهي وابستگي ختم ڪرڻ جو اعلان ڪري ڇڏيو آهي۔
هن فيصلي ميڊيا حلقن ۽ مداحن کي جذباتي ڪري ڇڏيو، ڇوتہ عشرت فاطمه جو نالو ڏهاڪن تائين پاڪستان ۾ معتبر ۽ سنجيده نيوز ريڊنگ جي علامت رهيو آهي۔
عشرت فاطمه سوشل ميڊيا پليٽفارم “ايڪس” (اڳوڻي ٽوئٽر) تي ريڊيو پاڪستان مان پنهنجي آخري خبرنامي جي وڊيو شيئر ڪئي، جنهن ۾ هن سامعين سان رخصت ٿيندي چيو ته هوءَ پنهنجي 45 سالن جي رفاقت کي الوداع چئي رهي آهي۔ هن ريڊيو پاڪستان ۽ سامعين جو دل جي گهراين سان شڪريو ادا ڪيو جن هن ڊگهي سفر ۾ ساٿ ڏنو۔
بعد ۾ هڪ 13 منٽ ڊگهي وڊيو پيغام ۾ عشرت فاطمه پنهنجي فيصلي جي پس منظر تي کُلي ڳالهه ڪئي۔ هن ٻڌايو ته هي فيصلو سندس لاءِ انتهائي مشڪل هو ۽ هوءَ ذهني طور تي شديد دٻاءَ جو شڪار هئي۔ هن چيو ته هن فيصلي کان اڳ الله کان دعا ڪئي ته ان ۾ سندس لاءِ بهترين ۽ آساني هجي۔
عشرت فاطمه ٻڌايو ته سندس نيوز ريڊنگ جو باقاعده سفر 1984 ۾ شروع ٿيو، جڏهنتہ 1983 کان هوءَ ريڊيو ۽ ٽيليويزن سان لاڳاپيل رهي آهي۔ هن چيو ته خبرون پڙهڻ سندس لاءِ رڳو پيشو نه پر هڪ جذبو، عشق ۽ جنون رهيو آهي، ۽ اڄ به آهي۔ هن واضح ڪيو ته سندس آواز، تلفظ، صحت ۽ ڪم جي صلاحيت ۾ ڪا به گهٽتائي نه آئي آهي ۽ هوءَ هميشه وقت جي پابند ۽ ڪم سان مخلص رهي آهي۔
هن شڪايت ڪئي ته ان جي باوجود کيس ڪم جا مناسب موقعا نه ڏنا ويا۔ بار بار کيس “سينيئر” ۽ “ليجنڊ” قرار ڏنو ويو، پر عملي طور سندس محنت ۽ تجربي کي اهو مقام نه مليو جنهن جي هوءَ حقدار هئي۔ هن چيو ته بار بار کيس اهو احساس ڏياريو ويو ته هاڻي سندس ضرورت نه رهي، جيڪو سندس لاءِ انتهائي تڪليف ڏيندڙ تجربو هو۔
عشرت فاطمه ٻڌايو ته هوءَ ڪافي عرصي تائين حالتن جي بهتر ٿيڻ جو انتظار ڪندي رهي، پر آخرڪار کيس ريڊيو پاڪستان ڇڏڻ جو فيصلو ڪرڻو پيو۔ البت هن مداحن کي يقين ڏياريو ته هوءَ مڪمل طور تي منظر تان غائب نه ٿيندي ۽ سوشل ميڊيا ذريعي پنهنجي چاهيندڙن سان رابطي ۾ رهندي، پنهنجون يادون ۽ تجربا شيئر ڪندي رهندي۔
واضح رهي ته عشرت فاطمه کي سندس شاندار خدمتن جي اعتراف ۾ حڪومتِ پاڪستان پاران پرائيڊ آف پاڪستان ۽ تمغهءِ امتياز جهڙا اعزاز ملي چڪا آهن۔ هوءَ پاڪستان ٽيليويزن جي مشهور رات نَوَ وڳي جي اردو خبرنامي جي اينڪر رهي آهي، جڏهنتہ سندس ڪيريئر جي شروعات ريڊيو پاڪستان جي پروگرام “کيل ۽ کلاڙي” سان ٿيو۔ شستہ اردو، پُراثر آواز ۽ باوقار انداز هن کي 1980 ۽ 1990 جي ڏهاڪن ۾ نمايان مقام ڏياريو۔
