سرينگر (ويب ڊيسڪ) والاريل ڄمون ۽ ڪشمير ۾ ڀارتي حڪومت طرفان حريت پسند قيادت خلاف ڪارروائيون جاري آهن. ڪشمير ميڊيا سروس موجب هڪ ڀارتي عدالت مشهور حريت پسند عورت اڳواڻ ۽ تنظيم دخترانِ ملت جي سربراهه آسيه اندرابي کي هڪ سياسي ۽ هٿ ٺولي ڪيس۾ ڏوهاري قرار ڏنو آهي.
رپورٽن مطابق ساڳئي ڪيس ۾ حريت پسند اڳواڻن فهيمده صوفي ۽ ناهيده نسرين کي به قصوروار قرار ڏنو ويو آهي، جڏهن ته ٽنهي اڳواڻن کي سزا 17 جنوري تي ٻڌائي ويندي. هي ڪيس ڀارت جي بدنام زمانه نيشنل انويسٽيگيشن ايجنسي اين آئي اي جي عدالت ۾ هلايو ويو.
ڪشمير ميڊيا سروس جو چوڻ آهي ته آسيه اندرابي کي اپريل 2018 ۾ هڪ سياسي ۽ هٿ ٺوڪيي ڪيس تحت گرفتار ڪيو ويو هو. هوءَ 1987 ۾ عورتن جي اڳواڻي ۾ قائم ڪيل آزادي پسند تنظيم دخترانِ ملت جي باني اڳواڻ آهي.
رپورٽن ۾ وڌيڪ ڄاڻايو ويو آهي ته آسيه اندرابي جو مڙس عاشق حسين به لڳ ڀڳ ٽن ڏهاڪن کان ڀارت ۾ هٿ ٺوڪين ڪيسن تحت قيد آهي. حريت حلقن جو چوڻ آهي ته اهڙا جابراڻا قدم ڪشميري عوام جي جدوجهدِ آزادي کي ڪمزور نٿا ڪري سگهن.
