ڪراچي(ويب ڊيسڪ) ڪراچي پوليس وڏي ڪارروائي ڪندي ٻارن سان جنسي زيادتي ۾ ملوث ٻن خطرناڪ جوابدارن کي گرفتار ڪري ورتو آهي. پوليس جي جاچ موجب گرفتار ٿيل جوابدار عمران ۽ وقاص خان 2020 کان 2025 تائين سو کان وڌيڪ ٻارن سان زيادتي جا واقعا ڪري چڪا آهن.
ايس پي انويسٽيگيشن عثمان سدوزئي ٻڌايو ته متاثر ٻار جي نشاندهي تي ٽيپو سلطان ۾ ڪارروائي ڪئي وئي، جنهن ۾ ٻنهي جوابدارن کي گرفتار ڪيو ويو. پوليس کي گذريل ڇهن سالن دوران مختلف ضلعن مان 7 شڪايتون مليون هيون، جن ۾ ڊي اين اي جا نمونا هڪ ئي شخص سان ملندڙ هئا. سڀني ڪيسن ۾ 12 کان 13 سالن جا ٻار نشانو بڻايا ويا.
پوليس موجب گرفتار مرڪزي جوابدار عمران منظور ڪالوني جو رهواسي آهي ۽ پنڪچر جو ڪم ڪندو آهي. عمران اعتراف ڪيو آهي ته هن ڪيترن ئي ٻارن کي ملير ندي جي ويجهو وٺي وڃي زيادتي جو نشانو بڻايو. هو موٽرسائيڪل تي ٻارن کي لالچ ڏئي ساڻ وٺي ويندو هو.
جاچ ۾ ظاهر ٿيو ته ٽي ڪيسن ۾ ٻارن عمران کي سڃاتو، جڏهن ته هڪ ڪيس ۾ ٻار عمران ۽ وقاص ٻنهي کي سڃاتو. هڪ واقعي ۾ ٻار جي رڙين تي جوابدار فرار ٿي ويا هئا.
وزيراعليٰ سنڌ مراد علي شاهه گرفتاري تي پوليس کي شاباش ڏيندي چيو ته ٻارن سان زيادتي جا ڪيس ڪنهن به صورت ۾ برداشت نه ڪيا ويندا. هن هدايت ڪئي ته جوابدارن خلاف شاهدين جي بنياد تي ڪيس عدالت ۾ داخل ڪيو وڃي ۽ کيس روزاني بنياد تي اڳڀرائي رپورٽ ڏني وڃي.
مراد علي شاهه وڌيڪ چيو ته سنڌ حڪومت لاءِ ٻارن جو تحفظ سڀ کان اهم آهي، اهڙن ڏوهارين لاءِ شهر ۾ ڪا جاءِ نه آهي. پوليس کي هدايت ڪئي وئي آهي ته باقي متاثرن کي به سامهون آندو وڃي ۽ جوابدارن کي سخت سزا ڏيارڻ لاءِ مڪمل قدم کنيا وڃن.
