ڪراچي: ڪراچي جي مصروف علائقي ايم اي جناح روڊ تي واقع مشهور گل پلازه ۾ رات دير سان خوفناڪ باهه تي اڃا تائين مڪمل طور تي ضابطو نه اچي سگهيو آهي، جنهن سبب شهر جو ماحول سوڳوار ٿي ويو آهي۔
باهه جي نتيجي ۾ واپارين کي اربين رپين جو نقصان پهتو، جڏهن ته 5 ماڻهو حياتي وڃائي ويٺا ۽ 20 کان وڌيڪ زخمي ٿي پيا۔
فائر بريگيڊ اختيارين موجب اڃا تائين باهه جي صرف 40 سيڪڙو حصي تي ضابطو آندو ويو آهي، جڏهن ته باهه جي شدت برقرار آهي۔ شاپنگ پلازه ۾ 1000 کان وڌيڪ دڪان موجود آهن۔
عمارت ۾ پيل گهاٽن دراڙن سبب صورتحال وڌيڪ ڳڻتي جوڳي ٿي وئي آهي ۽ فائر بريگيڊ اختيارين متاثر عمارت کي خطرناڪ قرار ڏئي ڇڏيو آهي۔
صورتحال جي سنگيني ۽ وڌندڙ خوف جي پيش نظر واپارين گل پلازه ٻاهران بيهي وڏي آواز ۾ ٻانگهون ڏيڻ شروع ڪري ڇڏيون۔ ٻانگهن جي گونج سڄي علائقي کي ڏک ۾ مبتلا ڪري ڇڏيو، هر اک آلي ۽ هر دل ڏکوئيندڙ نظر آيو۔
باهه سبب عمارت جو ڍانچو سخت متاثر ٿي چڪو آهي، جڏهن ته ريسڪيو ادارا پنهنجي جانين کي خطري ۾ وجهي باهه وسائڻ ۽ زخمين کي محفوظ هنڌن تي منتقل ڪرڻ ۾ مصروف آهن۔
هن افسوسناڪ سانحي تي گورنر سنڌ، چيئرمين پيپلز پارٽي بلاول ڀٽو زرداري، مصطفىٰ ڪمال، وزيراعليٰ سنڌ سميت ٻين سياسي ۽ سماجي شخصيتن گهري ڏک ۽ افسوس جو اظهار ڪندي، جانبحق ماڻهن جي لواحقين سان تعزيت ۽ زخمين جي جلد صحتيابي لاءِ دعا ڪئي آهي۔
