ڪراچي(ويب ڊيسڪ) صدر ڊونلڊ ٽرمپ جي ڌمڪين ۽ گرين لينڊ تي آمريڪي جهنڊو لهرائڻ واري تصوير سوشل ميڊيا تي شيئر ٿيڻ کان پوءِ هاڻي آمريڪي فوجي جهازن جي گونج گرين لينڊ جي آسمانن تي ٻڌي پئي وڃي.
عالمي خبرن موجب آمريڪي جنگي جهاز گرين لينڊ ۾ واقع آمريڪي فوجي اڏي ڏانهن روانا ٿي ويا آهن. آمريڪا ۽ ڪينيڊا جي گڏيل دفاعي اداري نارتھ اميريڪن ايئرو اسپيس ڊفينس ڪمانڊ (NORAD) پنهنجي بيان ۾ تصديق ڪئي آهي ته گرين لينڊ ۾ آمريڪي جهازن جي تعينات جو عمل شروع ٿي ويو آهي.
نوراڊ وضاحت ڪئي ته هي مقرري اڳواٽ طئي ٿيل دفاعي منصوبي جو حصو آهي ۽ گرين لينڊ جي حڪومت کي ان بابت اڳواٽ اطلاع ڏنو ويو هو. اداري موجب ڊنمارڪ حڪومت سان مڪمل هم آهنگي موجود آهي ۽ آمريڪي فورسز کي سڀ ضروري سفارتي اجازت ناما حاصل آهن.
دفاعي اختيارين مطابق اهي جهاز اتر آمريڪا جي دفاع ۽ معمول جي نگراني واري سرگرمين ۾ حصو وٺندا.
صدر ٽرمپ پنهنجي پيغام ۾ ناروي جي وزيراعظم يوناس گاهر اسٽوري کي چيو هو ته جيستائين آمريڪا کي گرين لينڊ تي مڪمل ڪنٽرول حاصل نه ٿيندو، عالمي سلامتي کي خطرا رهندا. هن کان اڳ ٽرمپ ڊنمارڪ تي الزام لڳائي چڪو آهي ته هو گرين لينڊ بابت روسي خطري کي منهن ڏيڻ ۾ ناڪام رهيو آهي.
ٻئي طرف ڊنمارڪ ۽ گرين لينڊ پنهنجي موقف کي ٻيهر واضح ڪيو آهي ته سندن زمين نه وڪري لاءِ آهي ۽ نه ئي ڪنهن ٻئي ملڪ جي حوالي ڪري سگهجي ٿي. ٻنهي ڌرين آمريڪي دعوائن کي رد ڪندي ڊنمارڪ جي خودمختياري ۽ گرين لينڊ جي خودمختيار حيثيت جي تصديق ڪئي آهي.
ياد رهي ته گرين لينڊ دنيا جو سڀ کان وڏو ٻيٽ آهي، جيڪو ڊنمارڪ جي بادشاهي اندر هڪ خودمختيار علائقو آهي. 1951ع ۾ آمريڪا ۽ ڊنمارڪ جي وچ ۾ دفاعي معاهدو ٿيو، جنهن تحت آمريڪا گرين لينڊ جي حفاظت جي ذميواري ورتي. ان کان پوءِ 1958ع ۾ آمريڪا ۽ ڪينيڊا نوراڊ نالي دفاعي معاهدو ڪيو، جنهن جو مقصد ميزائلن جي بروقت نشاندهي ۽ اتر آمريڪا جو فضائي دفاع هو.
گرين لينڊ ۾ واقع پٽوفڪ اسپيس بيس (سابقه ٿوليه ايئر فورس بيس) آمريڪا جو اهم فوجي ۽ مواصلاتي مرڪز آهي، جتي ميزائل وارننگ سسٽم به نصب آهي.
