ڪراچي (اسٽاف رپورٽر) ڪراچي جي مختلف علائقن ۾ تيز هوائن سان گڏ برسات سبب سيءُ وڌي ويو، جڏهن ته برسات جو سلسلو رات تائين وقفي وقفي سان جاري رهڻ جو امڪان آهي.
تفصيل موجب صائمہ عريبين ولاز، سرجاني، البيلہ، لسبيلہ، گارڊن ايسٽ، شو مارڪيٽ، رامسوامي، سوڪ سينٽر گلشن اقبال، نارٿ ڪراچي، يو پي موڙ ۽ ناگن چورنگي، ڪلفٽن، ڊفينس، محمود آباد، اخترڪالوني، قيوم آباد ۽ ٻين علائقن ۾ برسات سبب موسم ٿڌي ٿي وئي.
ايم اي جناح روڊ، نرسري، ايف ٽي سي، ايئرپورٽ، ملير، گلشن حديد، شاهه فيصل ڪالوني، گلشن معمار، احسن آباد ۽ جامعتہ الرشيد سميت ڪيترن ئي علائقن ۾ به برسات رڪارڊ ٿي.
شهر ۾ هلندڙ تيز هوائون خشڪ هوائن ۾ تبديل ٿي ويون، جڏهن ته ڪجهه ٻهراڙي جي علائقن ۾ تيز هوائون به هلڻ لڳيون.
موسميات کاتي اڳڪٿي ڪئي هئي ته اڄ ٻن پهرن کان شام تائين گج گوڙ سان گڏ هلڪي ۽ وچولي برسات ۽ تيز هوائن جو امڪان آهي. مغربي هوائن جو نئون سلسلو ظاهر ٿيڻ شروع ٿي ويو آهي، جنهن سان هوائن جي رفتار 40 ڪلوميٽر في ڪلاڪ رڪارڊ ٿي آهي، جيڪا وڌي 50 کان 55 ڪلوميٽر تائين پهچي سگهي ٿي.
موسميات کاتي موجب برسات جو سلسلو اڄ خميس تائين جاري رهندو، جڏهن ته ايندڙ ٽن ڪلاڪن دوران سنڌ جي مختلف ضلعن ۾ برسات جو امڪان آهي، جنهن ۾ دادو، قمبر شهداڪوٽ، لاڙڪاڻو، جامشورو ۽ حيدرآباد شامل آهن.
ڪراچي ۾ سيءُ جي شدت ايندڙ ڪجهه ڏينهن تائين برقرار رهندي، جڏهن ته بلوچستان مان ايندڙ سرد هوائن سبب گهٽ ۾ گهٽ گرمي پد 7 کان 9 ڊگري سينٽي گريڊ رهڻ جو امڪان آهي.
اڄ صبح هلڪي ڌند سبب حدِ نگاهه 2 ڪلوميٽر ۽ نمي جو تناسب 84 سيڪڙو رڪارڊ ٿيو. گهٽ ۾ گهٽ گرمي پد 13.5 ڊگري سينٽي گريڊ رهيو، جڏهن ته وڌ ۾ وڌ گرمي پد 21 کان 23 ڊگري سينٽي گريڊ رهڻ جي اميد آهي.
