اسلام آباد(ويب ڊيسڪ) پارليامينٽ جي گڏيل اجلاس ۾ عورتن ۽ ٻارن جي سماجي تحفظ بابت اهم قانون منظور ڪيو ويو آهي، جنهن تحت زال کي تڪڻ، طلاق يا ٻي شاديءَ جي ڌمڪي ڏيڻ، ۽ زال کي مرضي کان سواءِ گهر ۾ ٻين سان گڏ رکڻ کي قابل سزا جرم قرار ڏنو ويو آهي.
گڏيل اجلاس ۾ ڊوميسٽڪ وائلينس (پريوينشن اينڊ پروٽيڪشن) ايڪٽ 2026 منظور ڪيو ويو، جيڪو وفاقي گاديءَ واري هنڌ اسلام آباد تي لاڳو ٿيندو.
قانون زال، ٻارن، گهر جي بزرگن، معذورن، ٽرانس جينڊر ۽ گڏيل رهائش رکندڙ ٻين فردن تي لاڳو ٿيندو. قانون موجب زال يا ٻارن کي گاريون ڏيڻ، جذباتي يا نفسياتي طور تنگ ڪرڻ به ڏوهه آهي، جنهن تي ٽن سالن تائين سزا ۽ هڪ لک رپيا تائين ڏنڊ ٿي سگهي ٿو.
ايڪٽ ۾ واضح ڪيو ويو آهي ته زال يا گهر جي ٻين فردن کي جسماني تڪليف ڏيڻ جي ڌمڪي، پرائيويسي مجروح ڪرڻ، يا خيال نه رکڻ به قابل سزا ڏوهه آهي. جنسي ۽ معاشي استحصال به هن قانون ۾ شامل ڪيو ويو آهي، ۽ ڏنڊ ادا نه ڪرڻ جي صورت ۾ وڌيڪ ڇهه مهينا قيد ٿي سگهي ٿي.
عدالتن کي پابند ڪيو ويو آهي ته شڪايت تي درخواست اچڻ کان 7 ڏينهن اندر ٻڌڻي شروع ڪئي وڃي ۽ 90 ڏينهن اندر فيصلو ڪيو وڃي. متاثر شخص کي گڏيل رهائش ۾ رهڻ جو حق حاصل هوندو يا متبادل رهائش، شيلٽر هوم فراهم ڪيو ويندو، جڏهن ته تشدد ڪندڙ شخص کي متاثر فرد کان پري رکڻ جا حڪم جاري ڪيا ويندا.
قانون ۾ چيو ويو آهي ته تشدد ڪندڙ شخص کي جي پي ايس ٽريڪر پائڻو پوندو. گھريلو تشدد جي تعريف ۾ جسماني، جذباتي، نفسياتي، جنسي ۽ معاشي بدسلوڪي شامل ڪئي وئي آهي، جيڪا متاثر فرد ۾ خوف يا نقصان جو سبب بڻجي.
ڊوميسٽڪ وائلينس ايڪٽ 2026 تحت زال کي تڪڻ، ٻي شادي يا طلاق جي ڌمڪي ڏيڻ تي گهٽ ۾ گهٽ ڇهه مهينا ۽ وڌ ۾ وڌ ٽن سالن تائين سزا مقرر ڪئي وئي آهي. ساڳي طرح گاريون ڏيڻ يا نفسياتي طور تنگ ڪرڻ به هاڻي ڏوهه قرار ڏنو ويو آهي.
