وزارتِ خزانه آءِ ايم ايف سان رليف ۽ معاشي بحالي تي نئين حڪمت عملي تيار ڪري ورتي
اسلام آباد، پاڪستان – ويب ڊيسڪ: پاڪستان ۽ بين الاقوامي مالياتي فنڊ (IMF) وچ ۾ ٽئين اقتصادي جائزي بابت ڳالهين جو امڪان ايندڙ مهيني آهي، جنهن لاءِ آءِ ايم ايف جو جائزو مشن پاڪستان جو دورو ڪندو. ٽيون اقتصادي جائزو مڪمل ٿيڻ جي صورت ۾ پاڪستان کي هڪ ارب ڊالر جي ايندڙ قسط ملڻ جي اميد آهي.
ذريعن موجب، پاڪستان جي اقتصادي ٽيم آءِ ايم ايف سان ٽئين جائزي لاءِ تياريون تيز ڪري ڇڏيون آهن ۽ ضروري ڊيٽا به شيئر ڪئي وئي آهي. وزيراعظم جي هدايت تي وزارتِ خزانه آءِ ايم ايف سان ڳالهين لاءِ نيون ترجيحون طئي ڪرڻ جو فيصلو ڪيو آهي.
وزارتِ خزانه جي عملدارن جو چوڻ آهي ته حڪومت عوام، تنخواهدار طبقي ۽ صنعتي شعبي کي رليف ڏيڻ بابت آءِ ايم ايف سان ڳالهه ٻولهه ڪندي. ذريعن موجب وزيراعظم جي سربراهي ۾ وفد آءِ ايم ايف جي مئنيجنگ ڊائريڪٽر سان به ملاقات ڪئي، جتي قرض پروگرام ۾ رهندي مڪمل سهڪار جي يقيندهاني ڪرائي وئي.
وزيراعظم آءِ ايم ايف کان رليف حاصل ڪرڻ لاءِ ايندڙ ٻن هفتن اندر جامع تجويزون طلب ڪيون آهن، جڏهن ته صنعتي شعبي کي درپيش مسئلا گهٽائڻ لاءِ به سفارشون گهريون ويون آهن. ذريعن موجب آءِ ايم ايف سان ڳالهين ۾ صنعتن جي بحالي، تيز معاشي ترقي ۽ متبادل ٽيڪس حڪمت عملي پيش ڪئي ويندي.
آءِ ايم ايف رليف جي بدلي ۾ ٽيڪس نيٽ وڌائڻ بابت تجويزون گهريون آهن، جنهن تي فيڊرل بورڊ آف ريونيو (FBR) کي هدايت ڪئي وئي آهي ته موجوده مالي سال دوران ٻين ذريعن مان ٽيڪس آمدني وڌائي وڃي.
