نيويارڪ، ٽيڪساس سميت ڪيترين رياستن ۾ ايمرجنسي لاڳو، سردي زندگي منجمد ڪري ڇڏي
واشنگٽن/نيويارڪ، آمريڪا – ويب ڊيسڪ: آمريڪا ۾ شديد برفاني طوفان سبب اوڀر ۽ ڏکڻ رياستن ۾ روزمره زندگي مڪمل طور مفلوج ٿي وئي آهي. برف ۽ برفاني مينهن جي نتيجي ۾ گهٽ ۾ گهٽ 30 ماڻهو فوت ٿي ويا آهن، جڏهن ته لکين شهري سخت سردي ۽ بجلي جي بندش کي منهن ڏئي رهيا آهن.
پرڏيهي خبر ايجنسين موجب نيو ميڪسيڪو کان نيو انگلينڊ تائين هڪ فوٽ کان وڌيڪ برف پئي، جنهن سبب شاهراھون مڪمل طور برف سان ڍڪجي ويون ۽ ٽريفڪ معطل ٿي وئي. نيويارڪ، ميساچوسٽس، ٽيڪساس ۽ نارتھ ڪيرولائنا سميت ڪيترين ئي رياستن ۾ ايمرجنسي لاڳو ڪئي وئي آهي، جڏهن ته 25 کان وڌيڪ گورنرن ايمرجنسي جو اعلان ڪيو آهي.
طوفان سبب ڏکڻ رياستن ۾ ڏهاڪن کان پوءِ انتهائي سرد موسم ڏسڻ ۾ آيو، جتي ڳري برف سبب وڻ ۽ بجلي جون لائينون ڪري پيون. نيويارڪ سٽي ۾ گهٽ ۾ گهٽ پنج ماڻهو سردي سبب جان وڃائي ويٺا، جڏهن ته ٽيڪساس، آرڪنسا ۽ پنسلوانيا ۾ پڻ مختلف حادثن دوران انساني جانيون ضايع ٿيون.
موسميات کاتي موجب طوفان اوڀر سامونڊي پٽي مان گذري چڪو آهي، پر ڪينيڊا کان ايندڙ شديد ٿڌيون هوائون ايندڙ ڪيترن ڏينهن تائين گرمي پد کي منجمد سطح کان هيٺ رکڻ جو سبب بڻبيون. لڳ ڀڳ 20 ڪروڙ آمريڪي مختلف درجن جي شديد سردي وارن الرٽ هيٺ آهن.
برفاني طوفان سبب هوائي آمد و رفت به سخت متاثر ٿي. آچر ڏينهن 12 هزار کان وڌيڪ پروازون منسوخ ڪيون ويون، جڏهن ته سومر تي به هزارين پروازون رد ڪيون ويون. ڪيترن علائقن ۾ اسڪول بند ڪري آن لائن تعليم جو اعلان ڪيو ويو آهي.
