لندن(ويب ڊيسڪ) ايم ڪيو ايم (لنڊن) جي باني الطاف حسين جي طبيعت انتهائي خراب ٿي وئي جنهن کانپوءِ کين آچر جي رات دير سان اسپتال منتقل ڪيو ويو۔
رپورٽ موجب، سومر جي ڏينهن سماجي رابطي جي ويب سائيٽ “ايڪس” تي جاري ڪيل هڪ پوسٽ ۾ ايم ڪيو ايم لنڊن چيو ته: ايم ڪيو ايم جي باني ۽ قائد الطاف حسين کي آچر جي رات ڊاڪٽرن جي صلاح تي رت چاڙهيو پيو وڃي۔
بيان ۾ وڌيڪ چيو ويو ته الطاف حسين جي طبيعت خراب ٿيڻ سبب آچر جي شام اسپتال ۾ داخل ڪيو ويو۔
ان کان اڳ، رات جو لڳ ڀڳ 3:20 تي جاري ڪيل هڪ پيغام ۾ پارٽي ٻڌايو ته ايم ڪيو ايم جي باني ۽ قائد الطاف حسين جو آچر جي رات ڊاڪٽرن طرفان لنڊن جي اسپتال ۾ طبي معائنو ڪيو ويو، کين انجڪشن لڳايون ويو ۽ جسم ۾ ڪمزوري سبب ڊرپ لڳائي وئي۔ سومر جي ڏينهن ڊاڪٽرن جي ٽيم سندن تفصيلي معائنو ڪندي۔
پوسٽ ۾ چيو ويو ته الطاف حسين کي طبيعت ناساز ٿيڻ سبب آچر جي شام اسپتال آندو ويو، جتي ابتدائي معائني کان پوءِ ڊاڪٽرن کين داخل ڪيو۔ ايم ڪيو ايم جي رابطا ڪميٽي چيو آهي ته جيئن جيئن باني ۽ قائد جناب الطاف حسين جي صحت بابت نيون ڄاڻون ملنديون، تيئن تيئن ڪارڪنن ۽ عوام کي آگاهه ڪيو ويندو۔
گذريل سال جولاءِ ۾ به الطاف حسين کي اسپتال ۾ داخل ڪيو ويو هو، ان وقت ايم ڪيو ايم لنڊن جي رهواسي اڳواڻ مصطفيٰ عزيزآبادي ٻڌايو هو ته الطاف حسين جو مقامي اسپتال ۾ طبي معائنو ڪيو ويو، جتي ڊاڪٽرن سندن حالت جو جائزو وٺڻ لاءِ ابتدائي ٽيسٽون ڪيون ۽ وڌيڪ ٽيسٽون تجويز ڪيون۔ هن چيو هو ته ڊاڪٽرن رت جي منتقلي جي سفارش به ڪئي هئي، جنهن جو انتظام ڪيو ويو هو۔
الطاف حسين ٻن ڏهاڪن کان وڌيڪ عرصي کان لنڊن ۾ پاڻمرادو جلاوطني جي زندگي گذاري رهيو آهي۔ هن 1992 ۾ سياسي پناهه جي درخواست ڏني ۽ پوءِ برطانوي شهريت حاصل ڪئي۔
پاڪستاني اختيارين بار بار سندن خلاف ڪارروائي جو مطالبو ڪيو آهي، الزام آهي ته هو پاڪستان ۾ تشدد کي هوا ڏين ٿا۔
الطاف حسين 17 سيپٽمبر 1953 تي ڪراچي ۾ پيدا ٿيا۔ هن پنهنجو سياسي ڪيريئر هڪ شاگرد جي حيثيت سان شروع ڪيو ۽ 1978 ۾ عظيم احمد طارق سان گڏجي آل پاڪستان مهاجر اسٽوڊنٽس آرگنائيزيشن (اي پي ايم ايس او) جو بنياد وڌو۔ 1984 ۾ هن ايم ڪيو ايم جو بنياد رکيو۔
