ڪراچي (ويب ڊيسڪ) پاڪستان سميت سڄي دنيا ۾ اڄ ڪشير ڏهاڙو جوش ۽ جذبي سان ملهايو پيو وڃي. ملڪ جي ڪنڊ ڪڙڇ ۾ جلسا، جلوس، ريليون، سيمينار ۽ ڪانفرنسون منعقد ٿي رهيون آهن، جن ۾ ڪشميري عوام جي آزاديءَ جي جدوجهد ۽ انهن جي بي مثال قربانين کي ڀيٽا پيش ڪئي پئي وڃي. هن ڏينهن جو مقصد اهو عزم ٻيهر ورجائڻ آهي ته ڪشميري عوام پنهنجي حقِ خوداراديت جي جدوجهد ۾ اڪيلو نه آهي.
پاڪستان ۽ آزاد ڪشمير ۾ والاري واديءَ ۾ وهندڙ رت کي سلام پيش ڪيو پيو وڃي. ڪوهاٽ پل تي انساني هٿن جي زنجير ٺاهي، ڪشميري عوام سان ڀرپور همدردي ۽ محبت جو اظهار ڪيو ويو. سڄي دنيا ۾ رهندڙ پاڪستاني به اڄ پنهنجو آواز ڪشميري عوام سان ملائي رهيا آهن.
تلخ حقيقت اها آهي ته گذريل ست ڏهاڪن ۾ ڇهه لک کان وڌيڪ ڪشميري شهيد ٿي چڪا آهن. صرف گذريل 34 سالن ۾ 96 هزار کان وڌيڪ ڪشميري پنهنجي جان جو نذرانو پيش ڪري چڪا، جڏهن ته 7 هزار کان وڌيڪ ماڻهو حراست دوران شهيد ٿيا ۽ هڪ لک کان وڌيڪ ٻار پنهنجي والد جي شفقت کان محروم ٿي ويا.
05 آگسٽ 2019 کانپوءِ ڀارتي ظلم ۾ وڌيڪ شدت آئي، جنهن دوران صرف پنجن سالن ۾ 966 ڪشميري شهيد، 25 هزار کان وڌيڪ گرفتار ۽ هزارين کي عقوبت خانن ۾ ظلم جو نشانو بڻايو ويو. جنوري 2025 ۾ به رياستي جبر جو سلسلو جاري رهيو ۽ بيگناهه ڪشميرين جون حياتيون کسيون ويون.
ڪشمير ڏهاڙي جو جو مقصد اهو پيغام ڏيڻ آهي ته پاڪستان ڪشميري عوام سان گڏ بيٺو آهي، انهن جي جدوجهد اسان جي جدوجهد آهي، ۽ اهو ڏينهن ضرور ايندو جڏهن واديءَ ڪشمير ۾ آزاديءَ جو سج پنهنجي پوري آب و تاب سان طلوع ٿيندو.
