ممبئي (شوبز نيوز) بالي ووڊ جو مشهور ڪاميڊي اداڪار راجپال يادَو کي چيڪ باؤنس ڪيس ۾ ضمانت ملي وئي، جنهن بعد کين تيهار جيل مان آزاد ڪيو ويو.
راجپال يادَو، بالي ووڊ کي درجنين بلاڪ بسٽر ڪاميڊي فلمن ۾ يادگار ڪردار ڏنا، 2010 کان هلندڙ هڪ قانوني ڪيس ۾ ڏکيائين جو شڪار هو. هن ڪيس ۾ کين عدالت طرفان بار بار ادائيگي نه ڪرڻ تي جيل ۾ سرنڊر ڪرڻ جو حڪم ڏنو ويو هو.
گذريل هفتي دهلي جي عدالت سندن ضمانت جي درخواست رد ڪئي هئي ۽ چيو هو ته يادَو لڳ ڀڳ 9 ڪروڙ رپيا ادا ڪرڻ ۾ ناڪام رهيو. جسٽس سوارنا ڪانتا شرما واضح ڪيو هو ته سندن قيد محض رسمي نه هئي، پر هو معاهدي جي شرطن تي عمل نه ڪرڻ سبب جيل ويو. 16 فيبروري تي عدالت کين ڪجهه شرطن سان ضمانت ڏني، جنهن سان کين عارضي رليف مليو.
ڪيس جو پس منظر
هي معاملو 2010 جو آهي، جڏهن يادَو ۽ سندن زال پنهنجي هدايت ڪيل فلم آتا پتا لاپتا لاءِ لڳ ڀڳ 5 ڪروڙ رپيا قرض ورتو هو. فلم باڪس آفيس تي ناڪام ٿيڻ بعد قرض واپس ڪرڻ مشڪل ٿي ويو. مدعي ڪمپني مرلي پروجيڪٽس پرائيويٽ لميٽيڊ کي ڏنل ڪيترائي چيڪ باؤنس ٿي ويا، جنهن بعد قانوني ڪارروائي شروع ٿي ۽ سود ۽ جرمانن سان گڏ رقم وڌي 9 ڪروڙ تائين پهچي وئي.
تصفيو معاهدو ٿيڻ باوجود يادَو مبينا طور تي ادائيگيون نه ڪري سگهيا، جنهن سبب عدالت کين جيل ۾ سرنڊر ڪرڻ جو حڪم ڏنو. هاڻي ضمانت ملڻ سان کين عارضي آزادي ملي آهي، پر ڪيس اڃا به جاري آهي.
