ڪراچي (ويب ڊيسڪ) ڪراچي ۾ تاريخ جي سڀ کان وڏي چوري جي واردات سامهون آئي آهي، جتي اورنگي ٽائون اقبال مارڪيٽ ۾ نامعلوم چور جيولري جي دڪان جي ديوار ٽوڙي 30 ڪروڙ رپين کان وڌيڪ ماليت جو 606 تولا سون ۽ 25 لک رپين کان وڌيڪ ماليت جا هيرا چوري ڪري ويا.
متاثر جيولر ايوب خان جي مدعيت ۾ نامعلوم چورن خلاف ڪيس داخل ڪيو ويو آهي. واردات جي سي سي ٽي وي فوٽيچ به سامهون آئي آهي، جنهن ۾ ڏسي سگهجي ٿو ته چور ديوار ٽوڙي اندر داخل ٿيا. فوٽيچ ۾ هڪ سنهڙي چور بار بار ڪوشش ڪري ديوار مان اندر ويو، ۽ پوءِ ڪيمرا کي ڪپڙي سان ڍڪي ڇڏيو.
ايوب خان موجب 12 فيبروري جي رات دڪان بند ڪيو ويو هو، جڏهن ته 14 فيبروري جي صبح دڪان کولڻ تي ڪيترائي باڪس خالي مليا. دڪان جي پوئين حصي جي ديوار ٽٽل هئي ۽ 7 هزار 64 گرام سون، هيرا ۽ ٻيو سامان غائب هو، جنهن ۾ ڪسٽمرز جو سامان به شامل هو.
پوليس وڏي چوري جي جاچ شروع ڪري ڇڏي آهي. صوبائي گهرو وزير ضياءُ الحسن لنجار واقعي جي رپورٽ طلب ڪئي آهي ۽ هدايت ڪئي آهي ته ملوث جوابدارن کي فوري گرفتار ڪيو وڃي ۽ چوري ٿيل مال هٿ ڪيو وڃي. هن چيو ته شهر ۾ جيولري مارڪيٽن ۽ حساس تجارتي مرڪزن جي سيڪيورٽي وڌيڪ سخت ڪئي وڃي ۽ اهڙن ڏوهن ۾ ملوث ماڻهن خلاف سخت قانوني ڪارروائي ڪئي ويندي.
