اسلام آباد(ويب ڊيسڪ) پاور ڊويزن مستقبل ۾ سبسڊي بابت هڪ نئون پلان تيار ڪري ڇڏيو آهي. آءِ ايم ايف جي وفد کي حاليه ٽيرف جي ري اسٽرڪچرنگ ۽ سبسڊي بابت بريفنگ ڏني ويندي.
ذريعن موجب مستقبل ۾ صرف مستحق صارفين کي ئي سبسڊي ڏني ويندي، جيڪا بينظير انڪم سپورٽ پروگرام جي ذريعي فراهم ڪئي ويندي. بي آءِ ايس پي مان ڊيٽا حاصل ڪري صارفين جي ماهوار آمدني کي نظر ۾ رکندي سبسڊي ڏني ويندي.
پاور ڊويزن بي آءِ ايس پي سان گڏجي ڊيٽا گڏ ڪرڻ شروع ڪري ڇڏيو آهي. مستقبل ۾ صارفين کان بجلي جي مڪمل قيمت وصول ڪئي ويندي ۽ ڪراس سبسڊي يا ٻين شعبن تي اضافي بار نه وڌو ويندو. مستحق صارفين کي صرف بجٽ ۾ رکيل سبسڊي ڏني ويندي.
پيٽروليم ڊويزن جي ذريعن موجب گيس جي شعبي ۾ به ڪراس سبسڊي ختم ڪئي ويندي، ۽ اها سبسڊي ايندڙ بجٽ ۾ شامل ڪئي ويندي. واضح رهي ته گيس جي شعبي ۾ هن وقت 225 ارب رپين جي ڪراس سبسڊي موجود آهي.
