اسلام آباد (ويب ڊيسڪ) عمران خان جي وڪيل لطيف کوسا سپريم ڪورٽ کي خط لکي باني پي ٽي آءِ جي ميڊيڪل رپورٽس فراهم ڪرڻ جو مطالبو ڪيو آهي.
لطيف کوسا چيف جسٽس آف پاڪستان يحييٰ آفريدي کي خط لکيو، جنهن ۾ عمران خان جي ميڊيڪل رپورٽس ڏيڻ ۽ سندن ذاتي ڊاڪٽرن ڊاڪٽر فيصل ۽ ڊاڪٽر عاصم کي معائنو ڪرڻ جي اجازت ڏيڻ جو مطالبو ڪيو ويو آهي. خط ۾ اهو به چيو ويو آهي ته عمران خان کي الشفاء اسپتال منتقل ڪرڻ جو حڪم ڏنو وڃي.
خط مطابق عمران خان جي صحت جي بگڙجندڙ صورتحال گهر ڀاتين ۽ عوام لاءِ ڳڻتي جو سبب آهي. بيماري دوران به عمران خان کي بنيادي سهوليتن کان محروم رکيو ويو. عدالتي حڪم تي طبي معائنو ته ٿيو، پر گهر ڀاتين کي اڻڄاڻ رکيو ويو.
لطيف کوسا خط ۾ ان دعويٰ کي به رد ڪيو آهي ته عمران خان جي گهرڀاتين ۽ پارٽي اڳواڻن کي معائني وقت سڏيو ويو هو پر هو نه آيا. هن چيو ته اها دعويٰ بلڪل غلط آهي، گهرڀاتين کي اطلاع نه ڏيڻ ۽ خفيه طبي معائنو ڪرڻ ڪيترن خدشن کي جنم ڏنو آهي. گهرڀاتين کي طبي معاملي کان ٻاهر رکڻ سبب پريشاني ۽ خدشن ۾ اضافو ٿي رهيو آهي.
