اسلام آباد (ويب ڊيسڪ) اپوزيشن اتحاد تحريڪ تحفظِ آئينِ پاڪستان اعلان ڪيو آهي ته سندن مطالبا پورا ٿيڻ تائين پارليامينٽ هائوس ٻاهران ڌرڻو جاري رهندو.
اپوزيشن اتحاد جي اجلاس کان پوءِ تحريڪ انصاف جي اڳواڻ اسد قيصر پارليامينٽ هائوس ۾ ڳالهائيندي چيو ته اسان جي مشاورت جاري آهي ۽ ايندڙ لائحه عمل جو جلد فيصلو ڪيو ويندو. هن چيو ته اسان جو مطالبو آهي ته باني پي ٽي آءِ جي ذاتي ڊاڪٽر کي ملاقات جي اجازت ڏني وڃي ۽ پارٽي اڳواڻن ۽ خاندان سان به ملاقات ڪرائي وڃي.
اپوزيشن اتحاد جي فيصلي کان پوءِ پارليامينٽ ٻاهران ٻيهر ڌرڻو شروع ڪيو ويو، جتي پارليامينٽرينز مرڪزي دروازي اڳيان نعريبازي ڪئي.
ان کان اڳ مشاورتي اجلاس ۾ ميمبرن سوشل ميڊيا تي هلندڙ پروپيگنڊا مهم ۽ باني پي ٽي آءِ جي ڀينرن طرفان اٿاريل سوالن تي سخت خدشن جو اظهار ڪيو. ميمبرن مطالبو ڪيو ته پهرين اهو طئي ڪيو وڃي ته پارٽي کي عليمه خان ۽ خاندان هلائيندو يا سياسي ڪميٽي.
جنيد اڪبر ۽ شهريار آفريدي سميت ٻين ميمبرن چيو ته اسان ٽي ڏينهن کان ڌرڻي ۾ ويٺا آهيون، ان باوجود سوشل ميڊيا تي اسان جي خلاف مهم ۽ بيانبازي جاري آهي.
