ڪرڪ (ويب ڊيسڪ) 23 فيبروري تي قلعه شهيدن واري علائقي ۾ هڪ ڏکوئيندڙ واقعو پيش آيو، جتي فتنه الخوارج طرفان ايف سي جي زخمي اهلڪارن کي کڻي ويندڙ ريسڪيو 1122 جي ايمبولينس تي حملو ڪيو ويو. دهشتگردن ايمبولينس کي باهه ڏئي زخمي اهلڪارن کي جيئرو ساڙيو، جنهن ۾ سڀ اهلڪار شهيد ٿي ويا. شهيد ٿيل اهلڪار خيبرپختونخوا جا مقامي هئا.
تفصيل موجب، دهشتگردن پهريان ايف سي جي پوسٽ تي ڪواڊ ڪاپٽر ذريعي حملو ڪيو. ان کان پوءِ جڏهن ريسڪيو 1122 جون ٻه ايمبولينسون زخمين کي کڻڻ لاءِ پهتيون ته واپسي تي هڪ ايمبولينس کي باهه ڏئي مريضن سميت ساڙي ڇڏيو، جڏهن ته ٻي ايمبولينس زخمين کي محفوظ طريقي سان ٻاهر ڪڍڻ ۾ ڪامياب ٿي وئي.
پوليس ۽ سيڪيورٽي ادارن موجب دهشتگردن هن بربريت جي ويڊيو ٺاهي سوشل ميڊيا تي اپلوڊ ڪئي، جنهن جو مقصد عوام ۾ خوف ۽ دهشت پيدا ڪرڻ آهي. رمضان جي مقدس مهيني ۾ زخمين تي اهڙو ظلم اسلام جي تعليمات جي صريح خلاف ورزي ۽ کليل بربريت قرار ڏنو ويو آهي.
واقعي کان پوءِ علائقي ۾ سيڪيورٽي هاءِ الرٽ ڪئي وئي ۽ سرچ آپريشن شروع ڪيو ويو. حڪومتي ۽ سياسي اڳواڻن هن وحشي عمل جي سخت مذمت ڪئي آهي ۽ شهيدن جي خاندانن سان مڪمل همدردي جو اظهار ڪيو آهي.
اهو واقعو هڪ ڀيرو ٻيهر ثابت ڪري ٿو ته دهشتگرد عوام ۽ سيڪيورٽي اهلڪارن کي نشانو بڻائي خوف ۽ دهشت پکيڙڻ چاهين ٿا، پر انهن جون اهڙيون ڪوششون ڪڏهن به ڪامياب نه ٿينديون.
