اسلام آباد (ويب ڊيسڪ) وچ اوڀر جي تيز ٿيندڙ صورتحال تي نائب وزيراعظم ۽ پرڏيهي وزير اسحاق ڊار جو اهم بيان سامهون آيو آهي. سينيٽ ۾ بريفنگ ڏيندي هن چيو ته پاڪستان 28 فيبروري تي پهريون ردِعمل ڏنو هو، جنهن کان پوءِ آيت الله خامنه اي جي شهادت جي خبر آئي، جنهن تي وزيراعظم شهباز شريف افسوس جو اظهار ڪيو.
اسحاق ڊار ٻڌايو ته جون ۾ جڏهن ايران تي حملو ٿيو هو، تڏهن به پاڪستان معاملا سلجهائڻ جي ڪوشش ڪئي هئي. هن چيو ته ايران تي تازو حملو ٿيڻ کان پوءِ پاڪستان بغير اعلان جي بيڪ ڊور سفارتڪاري ذريعي معاملا حل ڪرڻ جي ڪوشش ڪري رهيو آهي.
پرڏيهي وزير وڌيڪ چيو ته گذريل ٽن ڏينهن ۾ پاڪستان ڪيترن ئي ملڪن سان رابطو ڪيو آهي، مقصد اهو آهي ته ڊپلوميٽڪ ڪوششن کي ڳالهين جي ميز تي آندو وڃي ۽ ڊائيلاگ ذريعي افهام و تفهيم پيدا ٿئي. هن ٻڌايو ته اومان جي پرڏيهي وزير سان به رات دير تائين ڳالهه ٻولهه ٿي.
اسحاق ڊار وضاحت ڪئي ته ايران اسان جو پاڙيسري ۽ مسلمان ڀائر ملڪ آهي، ۽ جيڪي ڳالهيون هو سينيٽ ۾ شيئر ڪري رهيو آهي، اهي ميڊيا سان به نه ڪيون ويون آهن. هن زور ڏنو ته عوام کي ڄاڻڻ گهرجي ته پاڪستان ايران لاءِ هر ممڪن ڪوشش ڪري رهيو آهي، اعلانيه ۽ بيڪ ڊور سفارتڪاري ٻنهي ۾ سرگرم آهي، ۽ ايران جي قيادت پاڪستان جي ڪوششن کان مڪمل طور تي واقف ۽ شڪرگذار آهي.
