اسلام آباد (ويب ڊيسڪ) قومي اسيمبلي جو اجلاس ڊپٽي اسپيڪر سيد غلام مصطفيٰ شاهه جي صدارت هيٺ ٿيو، جنهن ۾ ايوان ڪيترن ئي اهم قانوني بلن جي منظوري ڏني.
اجلاس دوران مجموعه فوجداري ترميمي بل 2025، پاڪستان جي نالي ۽ نشاني جي غير مجاز استعمال کي روڪڻ بابت بل، ۽ لازمي ٿيلسيميا اسڪريننگ بل 2025 منظور ڪيا ويا. ٿيلسيميا اسڪريننگ بل موجب شادي کان اڳ مڙس ۽ زال لاءِ ٽيسٽ لازمي هوندو، جڏهن ته نڪاح پڙهائيندڙ ٽيسٽ کانسواءِ نڪاح رجسٽرڊ ڪندو ته سندس لائسنس رد ۽ هڪ لک رپيا ڏنڊ لڳايو ويندو.
بل پيپلز پارٽي جي رڪن ڊاڪٽر شرميلا فاروقي پيش ڪيو، جڏهن ته جي يو آءِ جي ميمبر نعيمه ڪشور جي ترميم رد ڪئي وئي. سول ملازمين ترميمي بل 2024 به منظور ڪيو ويو، جيڪو شازيه مري پيش ڪيو. هن جي يو آءِ تي الزام لڳايو ته حڪومت سان مُڪ مُڪا ڪري نجي بلز جي مخالفت ڪئي پئي وڃي. جي يو آءِ جي عاليه ڪامران جواب ۾ چيو ته پيپلز پارٽي به پنهنجن بلز تي حڪومت سان مڪ مڪا ڪري ٿي.
ايم ڪيو ايم جي خواجه اظهار الحسن سول ملازمين بل کي آئين جي روح خلاف قرار ڏنو ۽ چيو ته ڪوٽا سسٽم اڳ ئي ملڪ کي نقصان ڏنو آهي، هاڻي ان ۾ وڌيڪ اقليتن ۽ عورتن جا ڪوٽا شامل ڪيا پيا وڃن. بحث کان پوءِ بل کي قائمہ ڪميٽي ڏانهن موڪليو ويو.
تعليمي نصاب ۽ درسي ڪتابن بابت وفاقي نگراني جو بل 2026 به منظور ڪيو ويو. اجلاس ۾ اتحادي جماعتون آمهون سامهون اچي ويون، جڏهن پيپلز پارٽي ايم ڪيو ايم جي هڪ بل جي مخالفت ڪئي. نويد قمر چيو ته بل تي وڌيڪ غور جي ضرورت آهي، جڏهن ته خواجه اظهار الحسن زور ڏنو ته بل اڳ ئي ڪميٽي مان پاس ٿي چڪو آهي. ڊپٽي اسپيڪر بل مؤخر ڪرڻ جي تجويز ڏني، جنهن تي ايم ڪيو ايم احتجاج ڪندي ايوان مان واڪ آئوٽ ڪيو.
اجلاس ۾ اپوزيشن رڪن جنيد اڪبر خان حڪومت تي الزام لڳايو ته ايران ۽ سعودي عرب بابت دفاعي معاهدي ۾ پارليمان کي اعتماد ۾ نه ورتو ويو. پيپلز پارٽي جي فتح الله خان ڊي آءِ خان جي مسئلن بابت احتجاج ڪندي چيو ته جيڪڏهن علائقي جي نمائندن کي نظرانداز ڪيو ويو ته هو ايوان ٻاهران بک هڙتال ڪندو.\
