ڪراچي(ويب ڊيسڪ) ايم 9 سپر هاءِ وي زمين جي معاملي تي سنڌ حڪومت ۽ نيشنل هاءِ وي اٿارٽي وچ ۾ تڪرار تيز ٿي ويو آهي.
اين ايڇ اي ايم 9 سپر هاءِ وي زمين جي قيمت ادا ڪرڻ کان انڪار ڪري ڇڏيو، جڏهن ته سنڌ حڪومت زمين ڏيڻ بند ڪري ڇڏي آهي.
نيشنل هاءِ وي اٿارٽي زمين جي تڪرار تي سنڌ هاءِ ڪورٽ سان رابطو ڪيو، جنهن تي عدالت معاملي کي حل ڪرڻ لاءِ ڪميٽي ٺاهڻ جو حڪم ڏنو.
چيف سيڪريٽري سنڌ جي صدارت هيٺ ڪميٽي زمين جي قيمت ادا ڪرڻ جي سفارش ڪئي، جڏهن ته اين ايڇ اي چيئرمين زمين جي منتقلي لاءِ چيف سيڪريٽري سنڌ کي خط لکيو.
ايم 9 سپر هاءِ وي کي 4 کان 6 لين تائين وڌائڻ جون تياريون آخري مرحلن ۾ آهن ۽ ان سلسلي ۾ ملائيشيا جي ڪمپني سان معاهدو وڌايو پيو وڃي.
سنڌ حڪومت 2012 ۾ زمين جي الاٽمينٽ کي قيمت جي ادائيگي سان مشروط ڪيو هو، جڏهن ته سرڪاري رپورٽ موجب، اين ايڇ اي وٽ زمين جي ادائيگي لاءِ فنڊ نه آهن.
ايم 9 سپر هاءِ وي کي ملير ۾ 1347 ايڪڙ، ڄامشورو ۾ 4954 ۽ ٺٽي ۾ 1340 ايڪڙ زمين جي ضرورت آهي، جڏهن ته ڊائريڪٽر آف لينڊ رڪارڊ جي رپورٽ سپر هاءِ وي رڪارڊ ۾ 264 فوٽ ويڪر ڏيکاري ٿي. اين ايڇ اي سپر هاءِ وي جي ويڪر کي 640 فوٽ تائين وڌائڻ جي تجويز ڏني آهي.
سرڪاري دستاويزن موجب، سپر هاءِ وي 152 ڪلوميٽر ڊگهو آهي، اين ايڇ اي صرف 136 ڪلوميٽر لاءِ درخواست ڏني هئي، جڏهن ته، اين ايڇ اي اوڀر ڪراچي ضلعي لاءِ ڪا به درخواست جمع نه ڪرائي.
سنڌ حڪومت 2017 ۾ زمين جي الاٽمينٽ جو فيصلو رد ڪري ڇڏيو هو، جڏهن ته سنڌ هاءِ ڪورٽ حڪم ڏنو هو ته زمين جي تڪرار کي 30 ڏينهن اندر حل ڪيو وڃي. عدالت تڪراري زمين جو گڏيل سروي ڪرڻ جي هدايت ڪئي ۽ رپورٽ طلب ڪئي.
