پنگريو (نمائندو) سنڌ ايمپلائيز الائنس پاران پنگريو ۾ هائير سيڪنڊري اسڪول کان پريس ڪلب تائين سرڪاري ملازمن جي پينشن سڌارن ۽ ٻين ملازم مخالف قدمن جي آڙ ۾ معاشي قتل خلاف احتجاجي ريلي ڪڍي وئي. ريلي ۾ مختلف کاتن سان تعلق رکندڙ ملازمن جي وڏي انگ شرڪت ڪئي.
ريلي کي خطاب ڪندي مقررين محمد رمضان جوڻيجو، قائم علي کوسو، ذوالفقار علي رند، شاهد محمود آرائين، سڪندر علي ڀرڳڙي، علي اڪبر چانڊيو، سليم سمون ۽ ٻين چيو ته سنڌ حڪومت پينشن سڌارن جي نالي تي صوبي جي سرڪاري ملازمن جي پينشن ۾ وڏي گهٽتائي ڪئي آهي، جنهن جي ڪري سرڪاري ملازمن کي رٽائرمينٽ کان پوءِ سخت معاشي مشڪلاتن کي منهن ڏيڻو پوندو.
انهن چيو ته سنڌ حڪومت موجوده بجيٽ ۾ سرڪاري ملازمن جي پگهارن ۾ مهانگائي جي شرح کان تمام گهٽ واڌ ڪئي آهي، جنهن جي ڪري ملازم اڳ ئي مسئلن کي منهن ڏئي رهيا هئا. ان باوجود، سنڌ حڪومت سرڪاري ملازمن جي پينشن جي شرح ۾ به وڏي ڪٽوتي ڪئي آهي.جنھن سبب رٽائرمينٽ کان پوءِ انھن لاءگزر سفر ڪرڻ انتهائي ڏکيو ٿي ويندو. مقررين چيو ته سنڌ ۾ سرڪاري ملازمن کي ڊي آر اي ۽ گروپ انشورنس نه ڏني پئي وڃي. پنھجي عيش عشرت جي خرچن کي گهٽائڻ بدران، سنڌ حڪومت اڳ ۾ ئي مالي طور تي پريشان سرڪاري ملازمن جو وڌيڪ استحصال ڪري رهي آهي، جنهن خلاف سڄي سنڌ ۾ سرڪاري ملازم احتجاج ڪري رهيا آهن.
پر، سنڌ حڪومت انهن جي ڳالهه نه ٻڌي رهي آهي ۽ ملازمن جي تحريڪ تي مناسب ڌيان نه ڏنو پيو وڃي. پر، حڪومت جي اها وڏي غلطي آهي ته سرڪاري ملازم ان معاشي قتل خلاف خاموش رهندا. هي تحريڪ نه رڳو انهن جي حقن جي حاصلات ۽ انهن جي مطالبن جي منظوري تائين جاري رهندي، پر ان ۾ تيزي ايندي. جيڪڏهن مطالبا منظور نه ٿيا ته، سنڌ جا لکين سرڪاري ملازم 6 آڪٽوبر تي بلاول هائوس ڪراچي جي سامهون ڌرڻو ڏيندا، جيڪو مطالبن جي منظوري تائين جاري رهندو. ريلي دوران شرڪت ڪندڙن نعرا هنيا، جڏهن ته ايڇ ايس ٽي ولي محمد ملڪ انقلابي شاعري پيش ڪئي ھوڏانھن. سنڌ ملازم اتحاد جي سڏ تي، پنگريو ۽ آس پاس جي علائقن جي شهرن يا گوٺن ۾ اڄ ٽي ڏينهن به تعليمي ادارا ۽ ٻيا سرڪاري دفتر بند رهياء معمول جوڪاروھنوارمعطل رھيو.
