ڪراچي (ويب ڊيسڪ) ڀارت جي خليج ڪيمبي تي هوا جي انتهائي گهٽ دٻاءَ جي صورتحال پيدا ٿيڻ بعد موسميات کاتي طوفان بابت پهريون الرٽ جاري ڪري ڇڏيو آهي.
طوفان جي وارننگ سينٽر موجب، هي ويل مارڪ علائقو خليج ڪيمبي ۽ ڀارت جي گجرات سان لڳندڙ علائقن جي ويجهو آهي، ۽ امڪان آهي ته هي گهٽ دٻاءُ اتر اولهه طرف وڌندو.
اڳڪٿي ڪئي وئي آهي ته هي دٻاءُ پهرين آڪٽوبر تي اتر اوڀر بحيره عرب ۾ ڀارتي علائقي سوراشٽرا تائين پهچي سگهي ٿو، جتي سمندري سرگرمي وڌڻ بعد هي سسٽم ڊپريشن ۾ تبديل ٿي سگهي ٿو.
موسميات کاتي جو چوڻ آهي ته هن وقت پاڪستان جي ڪنهن به سامونڊي علائقي کي ڪو خطرو ناهي، سسٽم جي نگراني جاري آهي، ۽ سائيڪلون وارننگ سينٽر ڪراچي صورتحال تي سخت نظر رکيو ويٺو آهي.
ٻئي طرف، موسميات کاتي ڪراچي جي موسم بابت ٻڌائيندي چيو ته اڄ ڏينهن جي شروعات گرم موسم سان ٿي، ۽ سامونڊي هوائون بند هجڻ سبب شهر ۾ حبس جي صورتحال برقرار آهي.
اڄ سموري ڏينهن سامونڊي هوائون بند رهڻ ۽ سڀاڻي سخت گرمي بعد شام جو هلڪي برسات جو امڪان آهي، جڏهن ته هوا ۾ نمي جو تناسب وڌڻ سبب گرمي جي شدت ۾ وڌيڪ اضافو متوقع آهي. اڄ ڪراچي جو وڌ کان وڌ گرمي پد 36 کان 38 ڊگري سينٽي گريڊ تائين وڃي سگهي ٿو.
موسميات کاتي خبردار ڪيو آهي ته خليج بنگال ۾ پيدا ٿيندڙ سمندري طوفان بحيره عرب طرف وڌي رهيو آهي، هي سسٽم ڀارتي گجرات مان اڳتي وڌي بحيره عرب ۾ داخل ٿيندو، جنهن جا اثر ڏکڻ اوڀر سنڌ، هيٺين سنڌ ۽ ڪراچي سميت سامونڊي علائقن تي به پئجي سگهن ٿا.
