شڪارپور (رپورٽ: عديل علوي) شڪارپور ۾ اسڪول تي حملي، مدرسي ۾ معصوم ٻار سان زيادتي ۽ وڌندڙ بدامني جي خلاف هيومن رائيٽس ڊفينڊرز نيٽ ورڪ (HRDN) ضلعي شڪارپور پاران هڪ هنگامي اجلاس مقامي هوٽل ۾ منعقد ڪيو ويو، جنهن جي صدارت نالي واري انساني حقن جي اڳواڻ اقبال ڏيٿو ڪئي. اجلاس دوران شرڪت ڪندڙن اسڪول حملي جي ڪيس داخل نه ٿيڻ ۽ لاڳاپيل اختيارين جي خاموشي تي سخت حيرت جو اظهار ڪيو. اجلاس ۾ فيصلو ڪيو ويو ته واقعي جي وڌيڪ جاچ لاءِ فيڪٽ فائنڊنگ ڪئي ويندي.
اجلاس ۾ ٺاروپور پاڙي جي مدرسي ۾ معصوم ٻار سان جنسي زيادتي جي فيڪٽ فائنڊنگ رپورٽ پڻ پيش ڪئي وئي، جنهن تي شرڪت ڪندڙن سخت افسوس جو اظهار ڪيو. ان سان گڏ بيدل لائبريري مان شاگرد جي چوري ٿيل موٽرسائيڪل بابت ڳڻتي ظاهر ڪئي وئي ۽ فيصلو ڪيو ويو ته HRDN پاران لائبريري جي سيڪيورٽي بهتر ڪرڻ لاءِ ايس ايس پي شڪارپور سان رابطو ڪيو ويندو. اجلاس دوران اهو به طئي ڪيو ويو ته جلد ئي ضلعي جيل جو دورو ڪيو ويندو، جتي قيدين جي بنيادي مسئلن کي اجاگر ڪري انهن جي حل لاءِ قدم کنيا ويندا.
اجلاس کي خطاب ڪندي اقبال ڏيٿو چيو ته، مون کي شڪارپوري هجڻ تي فخر آهي، ۽ شهر جي خدمت لاءِ مون کي ڪنهن سرڪاري عهدو جي ضرورت ناهي. مان اڳ به شھرين جي حقن لاءِ متحرڪ رهيو آهيان ۽ هاڻي به رهندس. HRDN جي ڪوآرڊينيٽر ۽ هيومن رائيٽس ڪميٽي جي فوڪل پرسن پرويز ابڙو خطاب ڪندي چيو ته شڪارپور ۾ انساني حقن جي سرعام لتاڙ ٿي رهي آهي، جنهن خلاف اسان پنهنجو ڀرپور ڪردار ادا ڪندا رهنداسين.
اجلاس ۾ نسيم بخاري، آصف شيخ، عديل علوي، ذوھيب شيخ، نوجباري، رحيم بخش ابڙو، بشير چوھاڻ ۽ ٻين پڻ خطاب ڪيو ۽ انساني حقن جي تحفظ لاءِ گڏيل جدوجهد جاري رکڻ جو عزم ورجايو.
