لاهور(ويب ڊيسڪ) وزيراعليٰ پنجاب مريم نواز شريف چيو آهي ته صوبي ۾ 100 سيڪڙو ميرٽ تي مقرريون ٿي رهيون آهن ۽ ڪرپشن خلاف زيرو ٽالرنس پاليسي اختيار ڪئي وئي آهي.
مريم نواز سان نيشنل سيڪيورٽي اينڊ وار ڪورس جي شرڪت ڪندڙن ۽ فيڪلٽي ميمبرن ملاقات ڪئي، جنهن دوران وزيراعليٰ پنجاب وفد کي حڪومت جي تاريخي ۽ فلاحي منصوبن بابت آگاهه ڪيو.
وفد سان ڳالهائيندي مريم نواز چيو ته حڪمرانن جا فيصلا عوام جي زندگي تي اثرانداز ٿين ٿا، سٺي حڪمراني جو بنيادي اصول احسان ۽ خدمت آهي. عوام جو پئسو صرف عوام تي خرچ ٿي رهيو آهي ۽ اي-ٽينڊرنگ ذريعي مڪمل شفافيت کي يقيني بڻايو ويو آهي.
هن چيو ته وطن ڌرتي ماءُ جيان آهي، ان سان بي وفائي ناقابل برداشت آهي. پنجاب ۾ هاڻ سياسي مقرريون ۽ اقربا پروري ختم ٿي چڪي آهي.
وزيراعليٰ پاڪستان آرمي، نيوي ۽ ايئر فورس کي آپريشن “بنيان مرصوص” جي ڪاميابي تي مبارڪباد ڏني ۽ فلڊ مارشل سيد عاصم منير سميت عسڪري قيادت کي خراج تحسين پيش ڪيو.
مريم نواز وفد کي ٻڌايو ته پنجاب ۾ امن امان جي صورتحال بهتر ٿي آهي، ٻوڏ دوران سڀ کان وڏو انخلا آپريشن مڪمل ڪيو ويو، ۽ متاثرن جي سڃاڻپ لاءِ ٿرمل اميجنگ ڊرونز ڪاميابي سان استعمال ڪيا ويا.
هن چيو ته پنجاب جي زراعت کي پهريون ڀيرو ميڪانائيزيشن جي طرف آندو پيو وڃي، ڪينسر جي مريضن لاءِ جديد ڪوئبليشن مشينن ذريعي علاج ممڪن بڻايو ويو آهي، جڏهن ته سموگ کان بچاءَ لاءِ 15 سموگ گنز درآمد ڪيون ويون آهن.
وفد ۾ پاڪستان آرمي، نيوي، ايئر فورس ۽ سول آفيسرن سميت 26 ملڪن جا 47 شرڪت ڪندڙ شامل هئا، جن ۾ آسٽريليا، برطانيا، چين، آمريڪا، سعودي عرب، ترڪي، يو اي اي، ايران، فلسطين ۽ ڏکڻ ڪوريا جا آفيسر به موجود هئا.
نيشنل سيڪيورٽي اينڊ وار ڪورس جي شرڪت ڪندڙن پنجاب جي عوامي فلاحي منصوبن جي واکاڻ ڪندي چيو ته پنجاب ۾ جاري منصوبا حيرت انگيز آهن.
