رياض (ويب ڊيسڪ) وزيراعظم شهباز شريف چيو آهي ته پاڪستان ۾ ڊجيٽلائيزيشن جي عمل سان ڪرپشن ۾ گھڻي گهٽتائي آئي آهي، ۽ حڪومت ماضي جي غلطين مان سبق وٺي ملڪي ترقي لاءِ انقلابي قدم کڻي رهي آهي.
هي اظهار هن فيوچر انويسٽمينٽ انيشيئيٽو جي نائين عالمي ڪانفرنس دوران اعليٰ سطح گول ميز مباحثي ۾ ڪيو، جنهن جو موضوع هو: “ڇا انسانيت صحيح رخ تي گامزن آهي؟“
وزيراعظم شهباز شريف چيو ته سعودي ولي عهد محمد بن سلمان جي ترقياتي ويزن جو ڀليڪار ڪريون ٿا. هن ٻڌايو ته پاڪستان قدرتي وسيلن سان مالا مال ملڪ آهي، جتي 60 سيڪڙو آبادي نوجوانن تي مشتمل آهي، جيڪي ملڪ جي مستقبل جا معمار آهن.
وزيراعظم جو چوڻ هو ته ايف بي آر سميت مختلف ادارن ۾ اصلاحات آندي ويون آهن، جن کي مڪمل طور ڊجيٽلائيز ڪيو ويو آهي. هن چيو ته انساني مداخلت گهٽجڻ سان ڪرپشن جا رستا بند ٿيا آهن، ۽ شفافيت ۾ واڌ آئي آهي.
شهباز شريف موسمياتي تبديليءَ تي ڳڻتي ظاهر ڪندي چيو ته پاڪستان انهن 10 ملڪن ۾ شامل آهي، جيڪي موسمي اثرن کان سخت متاثر ٿين ٿا. هن ٻڌايو ته ٻوڏ، ڪڪر جي ڦاٽڻ ۽ ٻين قدرتي آفتن سبب ملڪ کي اربين ڊالرن جو نقصان ٿيو آهي، ۽ متاثرن جي بحالي لاءِ وڌيڪ فنڊز جي ضرورت آهي.
وزيراعظم چيو ته مسلسل قرضن سبب ملڪ جي معيشت ڪمزور ٿي رهي آهي، ان ڪري انسانيت کي صحيح رخ تي وٺي وڃڻ لاءِ برابريءَ جي بنياد تي عالمي تعاون ضروري آهي.
هن زور ڏنو ته مصنوعي ذهانت (AI) سميت جديد ٽيڪنالاجي جي شعبي ۾ پاڪستان تيزيءَ سان اڳتي وڌي رهيو آهي. زرعي شعبي ۾ جدت آڻڻ لاءِ نوجوانن کي جديد ٽيڪنالاجي سان روشناس ڪرايو پيو وڃي، ۽ چين مان تربيت حاصل ڪري زرعي ترقيءَ لاءِ نوان قدم کنيا پيا وڃن.
شهباز شريف چيو ته مختلف شعبن ۾ گڏيل تعاون سان نه صرف ملڪ اڳتي وڌي سگهي ٿو، پر عالمي سطح تي انسانيت جي بهتريءَ لاءِ به نوان رستا کلي سگهن ٿا.
